Տարօն Տօնոյեան. «Իշխանութիւնը պէտք է հրաժարւի Պրագայի յայտարարութիւնից եւ յայտարարի զորահաւաք»
Այլեւս մենք մեր յույսը պէտք է դնենք մեզ վրայ. Նիկոլ Փաշինեանը յայտարարել է բազմիցս եւ այսօր եւս մէկ անգամ յայտարարեց, որ ինքը որեւէ գործողութիւն չի անելու Արցախի անվտանգութիւնը եւ արցախցիների ցեղասպանութիւնը կանխելու համար: Այս մասին այսօր՝ սեպտեմբերի 19-ին, կառավարութեան դիմաց բողոքի ակցիայի ժամանակ նշեց ՀՅԴ Հայաստանի ԳՄ անդամ, վիրաբոյժ, «Տօնոյեան» ԲԿ հիմնադիր Տարօն Տօնոյեանը:
«Այդպիսի ղեկավար այս օրհասական պահին մեզ պետք չէ: Ես կոչ եմ անում մեր բոլոր հայրենակիցներին՝ հաւաքւէք այստեղ եւ ձեր հաւաքւելուց է կախւած Արցախի ճակատագիրը: Ձեր հաւաքւելու պարագայում լինելու են յստակ գործողութիւնների ծրագրեր:
Առաջին քայլը պէտք է լինի այն, որ վարչապետը պէտք է հրաժարւի Բրիւսէլում ու Պրագայում իր յայտրարութիւնից, որ Արցախը ճանաչում է Ադրբեջանի մաս: Սա քաղաքական պահանջ է, լուրջ պահանջ է, լուրջ գործընթացի սկիզբ է:
Համար երկրորդը, որ պէտք է անի այս իշխանութիւնը, պէտք է ստիպենք մեր հայրենիքը պաշտպանելու համար յայտարարել զորահաւաք, որ երկիրը կարողանանք պաշտպանել: Մենք լաւ գիտենք, թէ ինչ տկար վիճակում է մեր բանակը այսօր:
Պէտք է պահանջենք ՊՆ նախարարին ու ԳՇ պետին ներկայ լինել եւ յստակ գործողութիւնների ծրագիր ներկայացնել, թէ ինչպէս են պատրաստւում պաշտպանել Արցախն ու Հայաստանը: Նիկոլ Փաշինեանի դէմքով ոչ մի գործընկեր մեր կողքին չի կանգնելու: Հաւաքւէք, եւ մենք կարող ենք շրջել այս ողբերգական էջը»,-յայտարարեց Տօնոյեանը:
