«ԱԼԻՔ» – Իրանի Իսլամական խորհրդարանում կրօնական փոքրամասնութիւնների պատգամաւորները, այդ թւում՝ Արա Շահվերդեանն ու Ռոբերտ Բեգլարեանը հանդէս են եկել համատեղ յայտարարութեամբ՝ ողջունելով Իսլ. յեղափոխութեան պահապանների կորպուսի կողմից սիոնիստական ռեժիմի դէմ իրականացւած պատժիչ գործողութիւնը:
«Պաղեստինը բռնազաւթած սիոնիստական կեղծ ռեժիմի ահաբեկչական եւ յանցաւոր արարքին տրւած ջախջախիչ պատասխանն Իրանի ժողովրդի եւ աշխարհի ազատատենչների անվիճարկելի իրաւունքն ու օրինական ակնկալիքն էր, ինչպէս նաեւ՝ Իրանի Իսլամական Հանրապետութեան համակարգի խոստման կատարումը։
Յանցաւոր ռեժիմներն ու ահաբեկիչները թող լաւ իմանան, որ Իրանի Իսլամական Հանրապետութեան անվտանգութիւնն ու Իրանի ժողովրդին պաշտպանելը, Իրանի Իսլամական Հանրապետութեան զինւած ուժերի կարմիր գիծն է, եւ բոլորս մեր ողջախոհութեամբ եւ ողջ կարողութեամբ, արթուն հետեւելով իրադարձութիւններին՝ ամբողջական պատրաստւածութեամբ ու բարձր ոգեւորութեամբ պաշտպանելու ենք մեր համակարգի իդէալներն ու նպատակները:
Մենք՝ Իսլամական խորհրդարանում կրօնական փոքրամասնութիւնների պատգամաւորներս, աջակցելով ԶՈՒ-ի գլխաւոր շտաբի, ՊՆ-ի, եւ ԻՅՊԿ-ի քաջարի ու նախանձախնդիր հրամկազմին, յատկապէս՝ ԻՅՊԿ հրթիռա-զենիթային ստորաբաժանումների հրամանատարին, այս յաջողութեան կապակցութեամբ շնորհաւորում ենք Յեղափոխութեան իմաստուն առաջնորդին եւ Իրանի հպարտ ժողովրդին, եւ զգուշացնում ենք Իսրայէլի կեղծ ռեժիմին ու նրա աջակիցներին, որ ցանկացած ոտնձգութիւն անպատասխան չի թողնւելու»,- ասւած է յայտարարութեան մէջ:
