Համախմբւել է պէտք, չարիքի իշխանութիւնը պէտք է հեռանայ

«ԱԼԻՔ» – Տաւուշի թեմի առաջնորդ Տ. Բագրատ արք. Գալստեանը Yerkir.am-ի հետ զրոյցում պատասխանել է հարցին, թէ ի՞նչ գնահատական կը տայ, Փաշինեանը օրեր առաջ տաւուշցիների գլխի տակ փափուկ բարձ էր դնում, սակայն անսպասելի յանձնեց գիւղերը։

«Ինչպէս ամենասկզբից էլ ասել ենք մենք, սա ուրացման եւ դաւաճանութեան գործընթաց է, որ այսօրւայ իշխանութիւնն իր ղեկավարով փորձում է հասցնել աւարտին։ Մեզ մարտահրաւէր է նետւած, եւ մենք պէտք է պատասխանենք այդ մարտահրաւէրին։ Բնականաբար, այն, ինչ մենք ասել ենք բոլոր ժամանակներում, որ այսպիսի պարտադրւած, միակողմանի «լուծումներ» չեն կարող լինել, որ դա անընդունելի է, եւ մենք չենք կարող համակերպւել դրա հետ, մենք մնալու ենք այդ նոյն կէտի վրայ, եւ ուղղակիօրէն շարունակելու ենք պատասխանել այդ նետւած մարտահրաւէրին։ Թէ ինչ կը լինի ապագայում, ուղղակիօրէն կը երեւայ»,- ասաց Սրբազանը՝ դիմելով  քաղաքացիներին:

«Ես մի բան էլ եմ խնդրում, համացանցում անհատ օգտատէրերը, խմբերը եւ այլն, յայտարարութիւնները տարածելիս, այս մասին խօսելիս նախ զգուշաւորութեամբ խօսեն, չվիրաւորեն որեւէ ձեւով, հեգնանք չլինի իրենց ասելիքների մէջ, այլ թող պատրաստւեն այս մարտահրւէրին ուղղակիօրէն դիմագրաւելու, այս մարտահրաւէրները յաղթահարելու եւ մեր յաղթանակների համար։ Հեգնելու փոխարէն կոնսոլիդացւել է պէտք, համախմբւել, եւ որ ամէն մէկը իր տեղում իր որոշակի ընդվզումը յայտնի՝ կը լինեն խմբեր, թէ անհատներ, որպէսզի մեր վերջնական յաղթանակը կնքենք։ Չարիքի իշխանութիւնը պէտք է հեռանայ»։