Արցախի նախագահ Սամուէլ Շահրամանեանը մի խումբ պատասխանատուների հետ դեռ կը մնայ Ստեփանակերտում

Արցախի Հանրապետութեան նախագահ Սամուէլ Շահրամանեանը մի խումբ պատասխանատուների հետ կը մնայ Ստեփանակերտում այնքան ժամանակ, մինչեւ չաւարտւեն սեպտեմբերի 19-ից 20-ը տեղի ունեցած ռազմական գործողութիւնների եւ սեպտեմբերի 25-ին Ասկերանի շրջանում վառելիքի պահեստի պայթիւնի հետեւանքով զոհւածների աճիւնների ու անհետ կորածների որոնողափրկարարական աշխատանքները։

Այդ մասին յայտնում են Արցախի տեղեկատւական շտաբից։

«Տեղեկացնում ենք նաեւ, որ կառավարութիւնը շարունակում է ուշադրութեան կենտրոնում պահել ՀՀ տեղափոխւել ցանկացող այն քաղաքացիների հարցը, ովքեր տարբեր պատճառներով հնարաւոր է, որ գտնւելիս լինեն Հանրապետութեան տարածքում»։