Տիգրան Աբրահամեան. «Փաշինեանի սիւնիքեան այցը նպատակ ունի երկիրը նախապատրաստել հանրաքւէի գործընթացին»

«ԱԼԻՔ» – «Փաշինեանի սիւնիքեան այցը, որին անշուշտ հետեւելու է այլ մարզեր այցելութիւններ, նպատակ ունի Հանրապետութիւնը նախապատրաստել հանրաքւէի գործընթացին»: Այս մասին ըստ Panorama.am-ի՝ ֆէյսբուքեան իր էջում գրել է ՀՀ Աժ «Պատիւ ունեմ» խմբակցութեան պատգամաւոր Տիգրան Աբրահամեանը։

Ըստ նրա՝ բանն այն է, որ Ադրբեջանի հետ ձեռք բերւած պայմանաւորւածութեան համաձայն, ՀՀ իշխանութիւնը պատրաստւում է եւս 4 գիւղ յանձնել Ադրբեջանին: Արարատի մարզում` Տիգրանաշէնը, իսկ Տաւուշում` Սոֆուլու, Բարխուդարլու եւ Վերին Ոսկեպար գիւղերը:

«Նկատի ունենալով այն հանգամանքը, որ այս գիւղերը ՀՀ օրէնսդրութեամբ մեր տարածքային ամբողջականութեան մաս են կազմում, սրանց յանձնումը կարող է տեղի ունենալ միայն հանրաքւէով:

Եթէ նախորդ դէպքում իշխանութիւնը կարողացաւ «սղցնել» իր զիջումը, ապա այս դէպքում լուրջ խնդիրներ կայ:

Թէ այս գիւղերի յանձնումը ինչ ռազմավարական հարւած է Հայաստանին` տարբեր առիթներով խօսել եմ ու դեռ կը խօսեմ, բայց փաստ է, որ իշխանութիւնը միակողմանի զիջումները դիտարկում է բացառապէս իր իշխանութեան պահպանութեան տեսանկիւնից եւ յանուն դրա շարունակելու է տրւել ադրբեջանական շանտաժին»,- գրել է նա։