Զատուլին. «Ռուսաստանը կարող է փակել դէպի Ադրբեջան չւերթները Ստեփանակերտի անւան հետ կապւած սկանդալի պատճառով»
«ԱԼԻՔ» – Ռուսաստանը կարող է հրաժարւել Ադրբեջանից ինքնաթիռներ եւ գնացքներ ընդունելուց, եթէ ռուսական քաղաքներն «անւանափոխելու» պրակտիկան լայն տարածում գտնի հանրապետութիւնում։ Այս մասին ըստ News.am-ի՝ RTVI-ին յայտարարել է Պետդումայի ԱՊՀ հարցերով յանձնաժողովի առաջին փոխնախագահ Կոնստանտին Զատուլինը՝ մեկնաբանելով ադրբեջանական լրատւամիջոցների արձագանքը ՏԱՍՍ-ի յօդւածում Ստեփանակերտ անւանման օգտագործմանը։
«Ինչ վերաբերում է ռուսական քաղաքների եւ աշխարհագրական հասկացութիւնների վերանւանմանը, որը Ադրբեջանը որոշել է իրականացնել որպէս վրէժ, ես նրանց յաջողութիւն եմ մաղթում։ Միակ բանն այն է, որ այս իրավիճակում մենք դժւար թէ կարողանանք Ադրբեջանից գնացքներ եւ ինքնաթիռներ ընդունել, եթէ այնտեղ նպատակակէտը գրւած լինի այնպէս, ինչպէս նրանք այժմ որոշել են»,- զգուշացրել է Զատուլինը։
Նա յոյս յայտնեց, որ Ռուսաստանը՝ «որպէս այսօրւայ Ադրբեջանից աւելի մեծ պատմական արմատներ ունեցող պետութիւն» եւ որպէս «աւելի հասուն հասարակութիւն», «յիմարութիւններ չի անի» եւ հայելային գործողութիւններով չի արձագանքի ադրբեջանական լրատւամիջոցներում ռուսական քաղաքների անւանափոխութեանը։
Զատուլինը նշել է, որ Ստեփանակերտը միշտ էլ եղել է Ստեփանակերտ, եւ դրա վերանւանումը «Խանքենդի» «պատճառ չէ քննադատելու» լրատւամիջոցների հաղորդագրութիւնները՝ Լեռնային Ղարաբաղի Հանրապետութեան տարածքում Ադրբեջանի սեփական բարբարոսական գործողութիւնների մասին։
«Խորհրդային ժամանակներում դա Ստեփանակերտն էր 20-ական, 30-ական, 40-ական, 50-ական, 70-ական թւականներին, մինչեւ Խորհրդային Միութեան փլուզումը։ Դա Ստեփանակերտն էր՝ որպէս Ադրբեջանի Հանրապետութեան, Ադրբեջանական ԽՍՀ-ի մաս, որի տարածքային ամբողջականութեանն այժմ յաւակնում է ժամանակակից Ադրբեջանը»,- ընդգծել է պատգամաւորը։
Նրա կարծիքով՝ Բաքուն ցուցադրում է «ինքնուրոյն ամբիցիաներ եւ հնարաւորինս անպատշաճ կերպով վարւելու ցանկութիւն՝ «Արեւմուտքի հետ նրա լայնածաւալ հակամարտութեան» փուլում Ռուսաստանի թշնամիների երախտագիտութեանն արժանանալու համար»։
«Սա միտումնաւոր չափազանցւում է, եւ մենք պէտք է հասկանանք դրա պատճառը, քանի որ Ադրբեջանի այսօրւայ ղեկավարութիւնը դրանում տեսնում է իր սեփական օգուտը, տեսնում է հնարաւորութիւն չհամաձայնւելու Ռուսաստանի հետ, չխորհրդակցելու, չլսելու նրան, ապա կճեղքի «Զանգեզուրի միջանցք»-ը եւ կը շարժւի Կասպից ծովի ուղղութեամբ՝ հետապնդելով իր եւ թուրքական շահերը»,- ասել է Զատուլինը։
Նշենք, որ յուլիսի 31-ին ՏԱՍՍ գործակալութիւնը լուր էր հրապարակել Ռուսաստանի ծագումով հայ նկարիչ Իւան Այւազովսկու յուշարձանի քանդման մասին Ստեփանակերտում, որը միշտ կոչւել է Ստեփանակերտ, չնայած Ադրբեջանի բոլոր ջանքերին: Ադրբեջանի արտաքին գործերի նախարարութիւնը սա գնահատեց որպէս «անյարգանք եւ վիրաւորանք երկրի տարածքային ամբողջականութեան նկատմամբ»:
Գործակալութիւնը պահանջել է դադարեցնել «ադրբեջանական տեղանունների աղաւաղումը»՝ սպառնալով հակառակ դէպքում «փոխադարձութեան սկզբունքի հիման վրայ Ռուսաստանի տարածքում գտնւող բազմաթիւ բնակավայրերին շնորհել իրենց սկզբնական անունները»։
Ադրբեջանի արտաքին գործերի նախարարութիւնն Այւազովսկու յուշարձանի քանդումը որակել է «տրամաբանական, ճիշտ եւ օրինական»: Նախարարութիւնը յայտարարել է, որ քանդակագործ Սալաւաթ Շչերբակովի կողմից ստեղծւած նկարչի կիսանդրին տեղադրւել է առանց Բաքւի թոյլտւութեան՝ Ղարաբաղում «ադրբեջանական տարածքների օկուպացիայի» ժամանակ:
