Արթուր Խաչատրեանն ու Իսակ Իւնանէսեանը Իրանի ադրբեջանախօս Sahar Azeri հեռուստաալիքով խօսել են «Տաւուշը յանուն Հայրենիքի» շարժման մասին
Շաբաթ ուշ երեկոյեան Իրանի ադրբեջանախօս Sahar Azeri հեռուստաալիքը հիւրընկալել է «Հայաստան» խմբակցութեան պատգամաւոր Արթուր Խաչատրեանին եւ Թեհրանի Հայ Դատի յանձնախմբի նախագահ Իսակ Իւնանէսեանին։
Արթուր Խաչատրեանը ներկայացրել է «Տաւուշը յանուն Հայրենիքի» շարժման պատճառներն ու պահանջները, մանրամասն անդրադարձել Փաշինեանի անվերջանալի միակողմանի զիջումներին, Ադրբեջանի եւ Թուրքիայի ագրեսիւ նւաճողական քաղաքականութեանը եւ անվերապահ կապիտուլեացիայի պահանջին։
Անդրադառնալով իշխանութեան այն պնդումներին, թէ այս շարժումը հայաստանեան չէ, այլ սադրւած ու հրահրւած է օտար պետութիւնների՝ մասնաւորապէս ՌԴ-ի կողմից, Խաչատրեանը յստակ նշել է, որ շարժումը համաժողովրդական է, քանի որ հայ ժողովրդի համբերութեան բաժակն արդէն լցւել է Փաշինեանի միակողմանի զիջումներով։ «Որեւէ ապացոյց Հայաստանի իրաւապահ եւ անվտանգային համակարգերը չեն ներկայացրել, որ շարժման թիկունքում կանգնած են երրորդ երկրները։ Սրանով Փաշինեանը փորձում է ցոյց տալ՝ իբրեւ թէ ժողովուրդն իրեն սիրում է, ինքը հեղինակութիւն ունի, իսկ այն ինչ փողոցում ենք տեսնում արտաքին ուժերի գործունէութեան հետեւանք է»։
Զրոյցի ընթացքում ընդդիմադիր պատգամաւորն ուշադրութիւն է հրաւիրել նոյեմբերի 9-ի եռակողմ յայտարարութեան վրայ, դրանով ստանձնած պարտականութիւնները չկատարելուն, ինչպէս նաեւ Արցախի էթնիկ զտմանն ու Արդբեջանին բռնակցմանը։ Խաչատրեանը նաեւ խօսել է տարածաշրջանային զարգացումների ու անվտանգային մարտահրաւէրների մասին։
Թեհրանի Հայ Դատի յանձնախմբի նախագահ Իսակ Իւնանէսեանն անդրադարձել է Հայաստանում սկիզբ առած շարժման առանձնայատկութիւններին ու Բագրատ Սրբազանի լեգիտիմութեանը, խօսել բոլոր ընդդիմադիր քաղաքական ուժերին կոնսոլիդացնելու հարցում նրա յաջողութեան մասին։ Իւնանէսեանը քննադատել է յունիսի 12-ին Բաղրամեան-Դեմիրճեան խաչմերուկում տեղի ունեցած ոստիկանական բռնութիւնների մասին՝ ԱՄՆ-ի եւ Եւրոպայի լռութիւնը։
Հարթակ տրամադրելով հայ ընդդիմադիր գործչին ու Իրանի հայ համայնքի ներկայացուցչին՝ Sahar Azeri հեռուստաալիքը ուղերձ է յղել ոչ միայն Իրանի ադրբեջանախօս հանրութեանը, այլեւ հէնց ադրբեջանցիներին, քանի որ Բաքւում եւս այս ալիքը մեծ լսարան ունի։ Իսակ Իւնանէսեանը Yerkir.am-ի հետ զրոյցում մատնանշեց տւեալ հեռուստաալիքի հետ հարցազրոյցի կարեւորութիւնը, որն արդիւնքն է Թեհրանի Հայ Դատի յանձնախմբի ջանքերի։
Իւնանէսեանի փոխանցմամբ՝ հեռուստաընկերութեան տնօրէնի ուշադրութեանն է արժանացել Արցախի մասին իր յայտարարութիւնները եւ մանաւանդ փաստը, որ մինչեւ 1918 թւականը Ադրբեջան անունով պետութիւն գոյութիւն չի ունեցել, որի մասին էլ նա խոստովանել է հարցազրոյցի աւարտին։ Իւնանէսեանը ներկայացրել է Արցախի հարցի պատմական ու իրաւական կողմերը։ «Անդրադարձել եմ նաեւ շարժման մասին՝ Սփիւռքի դիրքորոշմանը. սփիւռքահայերի մեծ մասը դէմ են Փաշինեանի վարած քաղաքականութեանը, յատկապէս ցեղասպանութեան հետեւանքով ձեւաւորւած Սփիւռքը․ Սփիւռքին խիստ մտահոգում է օրինակ՝ սահմանադրական փոփոխութիւնների հարցը, որով փաստացի Հայաստանը կը հրաժարւի Հայոց Ցեղասպանութեան ճանաչման հարցի հետապնդումից»,- յաւելեց Իւնանէսեանը։
