Վահրամ Բալայեան․ «Արցախի վտարանդի կառավարութիւնը պահելը՝ հետագայում պահանջատէր լինելու առումով կարեւոր է»
Արցախի վտարանդի կառավարութիւնը պէտք է պահւի․ դա նախ՝ հետագայում պահանջատէր լիելու առումով է կարեւոր, իսկ ներկայ պահին բռնի տեղահանւած արցախահայութեան խնդիրները համակարգելու համար։ «Փաստինֆօ»-ի հետ զրոյցում նման տեսակէտ հնչեցրեց Արցախի ԱԺ ՀՅԴ խմբակցութեան պատգամաւոր Վահրամ Բալայեանը։
«Ֆինանսական ոչ մեծ միջոցներով Արցախի պետական կառոյցները կրճատւած կազմով պահելը շատ կարեւոր է․ դա թոյլ կը տայ բռնի տեղահանւած արցախահայութեան խնդիրները համակարգել, հասցէագրել։ Միւս՝ աւելի հեռանկարային նպատակը հետագայում աշխարհաքաղաքական իրավիճակի բարենպաստ փոփոխութեան դէպքում՝ Արցախի հարցը կրկին քննարկման սեղան բերելն է։ Ինչպէս տեսնում էք, աշխարհը եռում է ու անընդհատ իրավիճակ է փոխւում․ չի բացառւում, որ ինչ-որ պահի հայ ժողովրդի համար նպաստաւոր իրավիճակ կը ստեղծւի․ դրան եւս պէտք է պատրաստ լինել»,-ասաց պատգամաւորը։
Հարցին Արցախի Հանրապետութեան Ազգային ժողովն արդեօք չի՞ կարող առոչինչ համարել Արցախի նախագահ Սամուէլ Շահրամանեանի հրամանը, որով 2024 թ․ յունւարի 1-ից կազմալուծւում է Արցախի Հանրապետութիւնը, Բալայեանը պատասխանեց․ «Դա միայն ԱԺ խնդիրը չի։ ԱԺ-ն կարող է հարցը բարձրացնել Սահմանադրական դատարանի առաջ՝ վերջինս էլ համապատասխան որոշում կայացնի՝ այնպէս, ինչպէս նախագահի ցանկացած որոշում բողոքարկելու իրաւունք ԱԺ-ն ունի»։
«Arfd.am»
