«Լկտի պահանջ». Իրանը քննադատել է Արեւմուտքի կոչը Իսրայէլի հանդէպ զսպւածութիւն ցուցաբերելու մասին
«ԱԼԻՔ» – ԱԳ նախարարութեան պաշտօնական ներկայացուցիչ Նասեր Քանանին քննադատել է Արեւմուտքի կոչը Իսրայէլի հանդէպ զսպւածութիւն ցուցաբերելու մասին՝ ի պատասխան ՀԱՄԱՍ-ի առաջնորդ Իսմայիլ Հանիէի սպանութեան: Նա այդ կոչը «լկտի պահանջ» է որակել:
Մեկնաբանելով Ֆրանիսիայի, Գերմանիայի եւ Մեծ Բրիտանիայի համատեղ յայտարարութիւնը, որում Իրանին կոչ է արւում զերծ մնալ Իսրայէլի դէմ ռազմական գործողութիւններից՝ ի պատասխան Հանիէի սպանութեան, ԱԳՆ մամլոյ խօսնակն ասել է. «Եւրոպական երեք երկրների ղեկավարները յայտարարութիւն են հրապարակել, այն դէպքում, երբ Սիոնիստական ռեժիմը շարունակում է կատարել ամէն տեսակ միջազգային յանցագործութիւններ, ներառեալ ցեղասպանութիւնը եւ ռազմական յանցագործութիւնները, պաղեստինեան անպաշտպան ժողովրդի դէմ արեւմտեան պետութիւնների եւ իսրայելական ռեժիմի հովանաւորների անտարբերութեան ստւերում»:
Ըստ նրա՝ եւրոպական եռեակի յայտարարութիւնը «լկտի պահանջ» է, որը զուրկ է քաղաքական տրամաբանութիւնից, հակասում է միջազգային իրաւունքի սկզբունքներին, բացայայտ աջակցութիւն է ահաբեկչութեանը տարածաշրջանում, ինչպէս նաեւ պարգեւատրում նրանց համար, ովքեր ցեղասպանութեան հրամաններ են տալիս եւ կատարում ռազմական յանցագործութիիւններ, ահաբեկչութիւն եւ յանցագործութիւններ մարդկութեան դէմ։
«Իրանը լի է իր ազգային ինքնիշխանութիւնը եւ անվտանգութիւնը պաշտպանելու վճռականութեամբ, նպաստելու տարածաշրջանային կայունութեանը եւ ստեղծելու զսպման միջոցներ նախապատճառի դէմ»,- ասել է ԱԳՆ պաշտօնական ներկայացուցիչը՝ ընդգծելով, որ Իրանը երբեւէ ոչ մէկից թոյլտւութիւն չի խնդրի իր իրաունքները իրականացնելու համար։
Աւելի ուշ, Իտալիայի արտաքին գործերի եւ միջազգային համագործակցութեան նախարար Անտոնիօ Տայանիի հետ հեռախօսազրոյցի ժամանակ, ԱԳ նախարարի պաշտօնակատար Ալի Բաղերի Քանին յստակեցրել է, որ Իրանը չի հրաժարւի Իսրայէլի դէմ իր օրինական իրաւունքի իրականացումից:
Բաղերի Քանին ասել է, որ Դամասկոսում Իրանի դեսպանատան, Բէյրութում բնակելի թաղամասի վրայ Իսրայէլի յարձակումները եւ դրան յաջորդած Իրանի պաշտօնական հիւրի՝ ՀԱՄԱՍ-ի քաղբիւրոյի ղեկավար Իսմայիլ Հանիէի սպանութիւնը «սիոնիստների ջանքերի վառ օրինակներ են՝ պատերազմը տարածաշրջանի այլ երկրներին տարածելու համար»:
Բաղերին ընդգծել է, որ Սիոնիստական ռեժիմի ագրեսիւ գործողութիւնները Սիրիայի, Լիբանանի եւ Իրանի Իսլամական Հանրապետութեան ինքնիշխանութեան եւ տարածքային ամբողջականութեան բացայայտ խախտում են, եւ որ Իրանը պնդում է հակաքայլեր ձեռնարկելու իր կարեւոր եւ օրինական իրաւունքը՝ շարունակելով Գազայի դէմ ագրեսիան դադարեցնելու իր ջանքերը։
Անդրադառնալով թեմային, Անտոնիօ Տայանին ընդգծել է, որ անհրաժեշտ է առաջ մղել նոր նախաձեռնութիւնը, որում Եգիպտոսը, Կատարը եւ ԱՄՆ-ը համաձայնութեան են եկել Գազայի հատւածում հնարաւորինս շուտ զինադադարի մասին: Նա անհանգստութիւն է յայտնել տարածաշրջանում լարւածութեան աճի կապակցութեամբ՝ նշելով, որ Իտալիան բոլոր կողմերից զսպւածութիւն է պահանջում՝ պատերազմը դադարեցնելու եւ Գազայում հրադադարի հասնելու համար:
Նշենք, որ աւելի վաղ, ՄԱԿ-ում Իրանի մշտական ներկայացուցչութիւնը յայտարարել էր, որ պաշտօնական Թեհրանը չի մասնակցելու զինադադարի բանակցութիւններին, որոնք ընթանալու են Եգիպտոսի, Կատարի եւ ԱՄՆ-ի միջնորդութեամբ:
