Իրանը ողջունում է ԵՄ-ի հետ փոխադարձ յարգանքի վրայ հիմնւած յարաբերութիւնների զարգացումը
«ԱԼԻՔ» – ԱԳ նախարար Սէյէդ Աբբաս Արաղչին հեռախօսզրոյցներ է ունեցել Եւրոմիութեան արտաքին քաղաքականութեան գերատեսչութեան ղեկավար Ժոզէֆ Բորէլի, ինչպէս նաեւ Գերմանիայի, Ֆրանսիայի եւ Մեծ Բրիտանիայի ԱԳ նախարարների՝ Անալենա Բերբոքի, Ստեֆան Սեժուրնէի եւ Դէյւիդ Լեմիի հետ:
Ժոզէֆ Բորէլի հետ հեռախօսազրոյցի ընթացքում, մեր երկրի արտաքին քաղաքական գերատեսչութեան ղեկավաը յայտնել է, որ Իրանը ողջունում է ԵՄ-ի հետ փոխադարձ յարգանքի վրայ հիմնւած յարաբերութիւնների զարգացումը։
Արաղչին նշել է, որ դա պահանջում է երկխօսութիւն՝ խնդիրները լուծելու եւ եւրոպական երկրների սխալ քաղաքականութիւնը շտկելու համար։
Իր երթին, Ժոզէֆ Բորէլը շնորհաւորել է Արաղչիին՝ ԱԳ նախարարի պաշտօնում նշանակւելու կապակցութեամբ: Նա յոյս է յայտնել, որ Իրանի եւ Եւրամիութեան միջեւ քաղաքական երկխօսութիւններն ու խորհրդակցութիւնները նախագահ Մասուդ Փեզեշքիանի նոր վարչակազմի օրօք կը շարունակւեն եւ կընդլայնւեն։
Կողմերը մտքեր են փոխանակել նաեւ երկկողմ հետաքրքրութիւն ներկայացնող մի շարք թեմաների, այդ թւում՝ պատժամիջոցների վերացման շուրջ բանակցութիւնների եւ Գազայի հատւածում Իսրայէլի ռեժիմի ցեղասպան պատերազմին առնչւող վերջին զարգացումների շուրջ։
Արաղչին եւ Բերբոքը քննարկել են տարածաշրջանային իրավիճակը եւ երկկողմ յարաբերութիւնները
Իրանի եւ Գերմանիայի ԱԳ նախարարներ Սէյէդ Աբբաս Արաղչին եւ Անալենա Բերբոքը հեռախօսազրոյցի ընթացքում քննարկել են տարածաշրջանի վերջին զարգացումները, ինչպէս նաեւ Թեհրանի եւ Բեռլինի երկկողմ յարաբերութիւնները։
Բերբոքը յոյս է յայտնել, որ նոր կառավարութեան օրօք երկու երկրների յարաբերութիւնները կընդլայնւեն՝ վերացնելով խնդիրներն ու խոչընդոտները։
Արաղչին իր հերթին կարեւորել է երկու երկրների միջեւ քաղաքական խորհրդակցութիւնները շարունակելու անհրաժեշտութիւնը։ Նա ընդգծել է, որ փոխադարձ յարգանքն ու ընդհանուր շահերի վրայ կենտրոնացումը անհրաժեշտ են տարբեր ոլորտներում յարաբերութիւնները պահպանելու եւ ամրապնդելու համար։
Իրանը չի հրաժարւի Հանիէի սպանութեան համար Իսրայէլին պատասխանելու իր իրաւունքից
ԱԳ նախարարը նաեւ առանձին հեռախօսազրոյցներ է ունեցել Ֆրանսիայի եւ Մեծ Բրիտանիայի իր գործընկերներ Ստեֆան Սեժուրնէի եւ Դէյւիդ Լեմիի հետ:
Հեռախօսազրոյցների ընթացքում նա ընդգծել է Թեհրանի նկատմամբ Սիոնիստական ռեժիմի յանցաւոր եւ ահաբեկչական գործողութեանն արձագանգելու Իրանի բացարձակ իրաւունքը՝ շեշտելով, որ Իսլամական Հանրապետութիւնը չի հրաժարւի իր այդ իրաւունքից:
