Արաղչին՝ Միրզոյեանի հետ հեռախօսազրոյցի ժամանակ. «Իրանը պաշտպանում է Հայաստանի տարածքային ամբողջականութիւնը»
«ԱԼԻՔ» – ԱԳ նախարար Սէյէդ Աբբաս Արաղչին հեռախօսզրոյց է ունեցել ՀՀ ԱԳ նախարար Արարատ Միրզոյեանի հետ:
Հեռախօսազրոյցի ընթացքում, զրուցակիցները քննարկել են Իրանի եւ Հայաստանի միջեւ երկկողմ յարաբերութիւնների օրակարգին առնչւող հարցեր՝ ընդգծելով բարեկամական կապերի, փոխադարձ հետաքրքրութիւն ներկայացնող ոլորտներում ամուր գործընկերութեան հետագայ ամրապնդման ուղղութեամբ շարունակական ջանքեր գործադրելու երկուստեք պատրաստակամութիւնը: Անդրադարձ է կատարւել առաջիկայ ծրագրերին:
Արաղչին ողջունել է երկու հարեւան եւ բարեկամ երկրների միջեւ աճող յարաբերութիւնները եւ յայտնել Իրանի պատրաստակամութիւնը ընդլայնելու Հայաստանի հետ կապերը։
Նա նաեւ վերահաստատել է պաշտօնական Թեհրանի աջակցութիւնը տարածաշրջանի երկրների, այդ թւում՝ Հայաստանի տարածքային ամբողջականութեանը եւ ընդգծել, որ Իրանը դէմ է միջազգային սահմանների ցանկացած փոփոխութեան։
Արաղչին աջակցութիւն է յայտնել Հայաստանի եւ նրա հարեւանների միջեւ խաղաղ բանակցութիւններին՝ յայտնելով Իրանի պատրաստակամութիւնը՝ աջակցելու կայուն խաղաղութեանը ողջ տարածաշրջանում։
Իր հերթին, Արարատ Միրզոյեանը շնորհաւորել է Սէյէդ Աբբաս Արաղչիին՝ արտգործնախարարի պաշտօնում ընտրւելու կապակցութեամբ: Նա ողջունել է Հայաստանի եւ Իրանի բարեկամական յարաբերութիւնները եւ յայտնել Իրանի հետ յարաբերութիւններն ընդլայնելու պաշտօնական Երեւանի վճռականութիւնը։
Նա նաեւ բարձր է գնահատել Իրանի դիրքորոշումը Հայաստանի տարածքային ամբողջականութեանն ու տարածաշրջանային իրադարձութիւններին աջակցելու հարցում։
Երկու երկրների արտգործնախարարները պայմանաւորւել են պահպանել շփումները։
