Բագրատ Սրբազան. «Այսօր պէտք է վերանկախացնենք ու վերաազատագրենք մեր պետութիւնը»

«ԱԼԻՔ» – Բագրատ Սրբազանը ուղերձ է յղել՝ նւիրւած ՀՀ Անկախութեան հռչակագրի 34-րդ տարեդարձին։

«Այն ծնւեց չափազանց ծանր պայմաններում, սակայն հակառակ բոլոր դժւարութիւնների, այն սահմանեց մեր գոյութեան իրաւունքը, եւ միեւնոյն ժամանակ խտացրեց մեր ազատութեան եւ անկախութեան տեսիլքը եւ պատմական արդարութիւնը վերականգնելու ձգտումը։

Մեզ համար մեր պետութիւնը միակ ու բարձրագոյն վայրն է, միջավայրն ու կառոյցը, որը մենք ստեղծել ենք մեր ձեռքերով ու ջանքերով, մեր հազարաւոր քոյրերի եւ եղբայրների արեան ու կեանքի գնով եւ վճարումով, ցանկանալով հաւատարիմ մնալ մեր այն տեսիլքին, որն ունեցել են մեր նախնիները եւ որով ուրւագծել են մեր գալիքը։

Դժբախտաբար, այսօր մեր իսկ պետութեան մէջ կանգնած ենք առաւել ծանր մարտահրաւէրների առջեւ, երբ գողացւած են մեր պատիւը, կենսագրութիւնը, իղձերն ու երազանքները, երբ յանձնւած է մեր հայրենիքը՝ Արցախ աշխարհը, երբ անվտանգ չեն մեր պետութեան սահմանները, երբ բոլոր առումներով խախտւած են քաղաքացիների ապրելու իրաւունքները, հարցականի տակ է դրւած Ցեղասպանութեան ճանաչումը, ամբողջութեամբ խախտւած են թէ՛ հռչակագրի, թէ՛ նրանից բխած մեր Սահմանադրութեան դրոյթները, չարիքի կողմից զաւթւած են մեր պետականութիւնը, եւ վերջապէս, թշնամու թելադրանքով ու պահանջով փորձ է արւում փոփոխութեան ենթարկել մեր Սահմանադրութիւնը, որը յայտարարւած մասով վերաբերում է Սահմանադրութեան նախաբանին, ու դրանում եղած յղմանը՝ անկախութեան հռչակագրին»։

Սրբազանի խօսքով՝ այժմ կանգնած ենք մեր պետութիւնը վերանկախացնելու եւ վերաազատագրելու իրականութեան առջեւ․

«Մենք պէտք է հասկանանք, որ սեփական պետականութիւն ունենք, եւ, որ կոչւած ենք այն դարձնելու մեր աւետեաց երկիրը, մեր իղձերի եւ երազանքների իրացման եւ իրականացման սրբազան երկիրը։ Հայեացքներս ուղղած մեր իսկ ժողովրդի հարազատ ներուժին եւ կարողականութեանը, հոգեւոր եւ բարոյական հիմքերին, առանց դրսի որեւէ ուժի թելադրանքի կամ պարտադրանքի եւ կամ նրանցից ողորմութիւն մուրալու հոգեբանութեան, այլ արտաքին յարաբերութիւններում վերադառնալու կանխատեսելի եւ վստահելի գործընկերոջ կարգավիճակին։ Անկախութեան հռչակագրին համահունչ մենք կոչւած ենք սեփական հայկական օրակարգով կրելու բոլոր պարտաւորութիւններն ու պատասխանատւութիւնները, որը ենթադրում եւ թելադրում է ազատ եւ անկախ պետականութիւն ունենալու մեծ գաղափարը»,- ասել է Բագրատ Սրբազանը։