Հիւսիսային Կորէան յայտարարել է միջուկային սպառնալիքների զսպման համար ԱՄՆ-ի հետ առճակատման նախապատրաստւելու մասին
«ԱԼԻՔ» – Հիւսիսային Կորէայի ԱԳ նախարարութիւնը յայտարարել է միջուկային սպառնալիքների զսպման համար ԱՄՆ-ի հետ երկարաժամկէտ առճակատմանը նախապատրաստւելու ուղղութեամբ գործնական քայլերը շարունակելու մասին։ Փոխանցում է «ՌԻԱ Նովստի»-ն:
Երկրի ԱԳՆ յայտարարութիւնը հրապարակւել է Հիւսիսային Կորէայի Կենտրոնական հեռագրային գործակալութեան կայքում:
Նշւում է, որ վերջերս Միացեալ Նահանգները եւ Հարաւային Կորէան անցկացրել են «Ընդլայնւած զսպման ռազմավարական խորհրդատւական մարմնի» եւ «Միջուկային խորհրդատւական խմբի նմանակման վարժանք» հանդիպում, ինչը Փհենեանի գնահատմամբ, ցոյց է տալիս Հիւսիսային Կորէայի դէմ ռազմական դաւադրութեան հետագայ ընդլայնման մտադրութիւնը:
Յայտարարութեան մէջ Հիւսիսային Կորէայի ԱԳ նախարարութիւնը լուրջ մտահոգութիւն է յայտնել եւ խստօրէն դատապարտել գործողութիւնները, որոնք խաթարում են տարածաշրջանային ռազմավարական կայունութիւնը եւ մեծացնում միջուկային հակամարտութեան հաւանականութիւնը:
Փհենեանը ԱՄՆ-ին մեղադրել է Կորէական թերակղզում եւ տարածաշրջանում աւելի ու աւելի անվտանգութեան միջավայրի վատթարացման աղբիւր հանդիսանալու եւ միջուկային սպառնալիքների ստեղծման մէջ:
Երկրի ԱԳՆ-ն ընդգծել է, որ խստօրէն վերահսկելու եւ կառավարելու է Կորէական թերակղզու անվտանգային իրավիճակը եւ կը շարունակի գործնական միջոցներ ձեռնարկել՝ նախապատրաստւելու միջուկային սպառնալիքների զսպման ուղղութեամբ ԱՄՆ-ի հետ երկարատեւ առճակատմանը:
