ԱԳՆ տեղակալ Շէյխօլէսլամին հանդիպել է Արարատ Միրզոյեանի հետ
«ԱԼԻՔ» – ԱԳ նախարարի տեղակալ Հասան Շէյխօլէսլամին, երէկ՝ սեպտեմբերի 10-ին Երեւանում հանդիպել է ՀՀ ԱԳ նախարար Արարատ Միրզոյեանի հետ: Այս մասին տեղեկացնում է ՀՀ ԱԳ նախարարութիւնը:
Հանդիպման ընթացքում զրուցակիցները քննարկել են երկկողմ օրակարգի եւ տարածաշրջանային զարգացումներին վերաբերող հարցեր:
Նախարար Միրզոյեանը ողջունել է «Երեւանեան երկխօսութիւն» միջազգային ֆորումին իրանական կողմի մասնակցութիւնն ու կայացած մտքերի փոխանակումը։
Երկուստեք ընդգծւել է երկու հարեւան եւ բարեկամ երկրների միջեւ ձեւաւորւած բարձր մակարդակի քաղաքական երկխօսութեանը համահունչ՝ փոխադարձ հետաքրքրութիւն ներկայացնող ուղղութիւններով փոխգործակցութեան կարեւորութիւնը։
Զրուցակիցները քննարկել են տարածաշրջանային բնոյթի հարցեր: Անդրադարձ է կատարւել Հարաւային Կովկասում յարատեւ կայունութեան եւ խաղաղութեան հաստատման ուղղութեամբ ներդրւող ջանքերին, եւ այս համատեքստում ՀՀ ԱԳ նախարարն անդրադարձել է Ադրբեջանի հետ խաղաղութեան գործընթացին։
Տարածաշրջանային տրանպորտային եւ տնտեսական հաղորդակցութիւնների ապաշրջափակման համատեքստում շեշտւել է «Խաղաղութեան խաչմերուկ» ծրագրի հայեցակարգի հիմքում դրւած սկզբունքների, մասնաւորապէս տարածքային ամբողջականութեան եւ ինքնիշխանութեան անվերապահ յարգման հրամայականը, որի առնչութեամբ իրանական կողմի հաստատուն դիրքորոշումն Արարատ Միրզոյեանը բարձր է գնահատել։
