Փաշինեանի քեռու շոկոլադի Խ տառը

ԱՆԱՀԻՏ ՈՍԿԱՆԵԱՆ

 

Խաղաղութեան պայմանագրի՞ց սկսեմ, Աժ-ի միջազգային չափանիշերին, վերջապէս համընկումի՞ց, Միրզոյեանի՝ Ալիեւին իրենց կախականջ լսարանի հետ շփոթելո՞ւց,   Փաշինեանի երկնած նոր չափաձողից՝ նիւթի ու իդէալի մասին, կգ. սմ. նախարարի «չյուզւելու» մասին խայտառակ յորդորի՞ց,… ինչի՞ց։

Սկզբունքօրէն՝ մէկ է։ Իրար հաւասար կարեւորութիւն ունեցող դէպքեր են՝ անկարեւոր իրենք իրենցով ու որոշիչ՝ մեր գլխին։

Խաղաղութեան պայմանագրի մասին յայտարարութիւնը նրանով կարող է յայտնի դառնալ, որ երեւան բերեց միակ անհամաձայնութիւնը փաշինեանեան խմբի եւ ալիեւեան իշխանութեան միջեւ։

09/09-ին Միրզոյեանը բեմից յայտարարում է՝  խաղաղութեան տեքստը ծայրից ծայր համաձայնեցւած է, րոպէ առաջ կարող ենք ստորագրել։

Լիւքսեմբուրգի ԱԳՆ-ն էլ կողքը կանգնած վկայ։

Մի մատ երկրի ԱԳՆ-ն եկել է Երեւան, ինքնիշխան երկրի Միրզոյեանն այնպէս է դողում, որ համարձակւում է սուտ խօսել՝ թոզ փչել եւրոպացի իր գործընկերոջ աչքերին. «Ադրբեջանին փոխանցած «խաղաղութեան պայմանագրի» նախագծի 10-րդ խմբագրութիւնը ներառում է ամբողջապէս համաձայնեցւած տեքստը»։

Մի կողմ թողնենք 10 անգամ խմբագրւած ու այդպէս էլ հայաստանեան հանրութեանը անյայտ մնացած տեքստի բովանդակութիւնը, որում սակայն, ինչպէս պարզւում է՝ չկայ գերիների վերադարձի մասին դրոյթ, ինչի մասին հերթական «աչքալուսանքը» արեց Ալէն Սիմոնեանը, թէ՝ դա այն նոյ. 9-ի թղթի մէջ կայ։

Ո՞ւ։

Ու այնուամենայնիւ ինչու Միրզոյեանը շտապեց իրենց ներքին խաղաղութեան բարաթը յայտարարել ամբողջական՝ գլուխ էր գովում, դիւանագիտական քպ հնարք էր բանեցում,… անհասկանալի է։ Ու Ադրբեջանը հակադարձեց Միրզոյեանին, ԱԳՆ մամուլի քարտուղար Այխան Հաջիզադէի մակարդակով նրան ստախօս լինելը հրապարակելով։

«Այս պահին նախագծի դրոյթների մեծ մասը, այսինքն՝ շուրջ 80 տոկոսը, համաձայնեցւած են, սակայն որոշ դրոյթներ դեռեւս համաձայնեցւած չեն»։

Փաշինեանենց առաջարկը, թէ՝ եկէք կիսադատարկ թուղթը ստորագրենք, յետոյ վրան կը լրացնենք, ալիեւենք չկերան։

Ադրբեջանը ոչ միայն չհամաձայնեց «յետոյ լրացնելուն», այլեւ յիշեցրեց «Ադրբեջանի արեւմտեան շրջանները Նախիջեւանի Ինքնավար Հանրապետութեանը միացնող կոմունիկացիաների բացման հարցով գրաւոր պարտաւորութիւնների առկայութեան մասին», որոնք «վերջին մօտ չորս տարւայ ընթացքում դրանք չի կատարել»:

Իբր իրենք իրենց մասով արել են ամէն ինչ։ Բայց ով կասի դա Ալիեւին։ Մի կէս բերան կարո՞ղ է յիշեցնէք, թէ ինչեր էք տւել՝ առանց թղթի ու ամենայն ջիգեարով։ «Ադրբեջանի արեւմտեան շրջանները»։  

Նկատէք՝ Փաշինեանը էլ Ալիեւի սիրելին չէ, էլ բանաւոր բաներ չեն պայմանաւորւում։

Ու մինչ Ալիեւը կրկին միակողմանի սէր է պարտադրում՝ Լիտւայում Գէորգ Պապոյեանը գովազդում է  «Խաղաղութեան խաչմերուկը», բա թէ՝  տնտեսապէս կարեւոր է։

«Հացելու» գինը։ «Ադրբեջանի արեւմտեան շրջանները»։ «Այստեղ հաց»։  Այստեղ  այֆոն՝ եւ նիւթ, եւ  իդէալ՝ տեղ գտած դասագրքերում։ 

Թէ ինչպիսին կը լինի շարունակութիւնը՝ կորոշւի, ամենայն հաւանականութեամբ ԱԺ-ի նորաբաց սրճարանում, ուր «գրեչկայ» չեն մատուցի ու Փաշինեանի ստեղծած ապագայում գրեչկայ կերած անցեալը երեսով չեն տայ։

Թէպէտ՝ ինչ արժէ անցեալում գրեչկայ ուտելը, եթէ Փաշինեանը յայտարարել է, որ ինքը վրէժ չի լուծում ժողովրդից շոկոլադ չուտելու պատճառով, եւ որ «քեռին» հէնց լաւ էլ շոկոլադ տւել է իրեն։

Panorama.am