Իրանը եւ Ռուսաստանը քննարկել են «Հիւսիս-Հարաւ» միջանցքի զարգացումը եւ Ռաշտ-Աստարա երթուղին

«ԱԼԻՔ» – «Իրանի երկաթուղիներ» ընկերութեան գլխաւոր տնօրէն Ջաբբար Ալի Զաքերին եւ նրա ռուս գործընկեր Օլեգ Բելոզերովն ընդգծել են «Հիւսիս-Հարաւ» միջանցքի զարգացման գործում համագործակցութեան ընդլայնման կարեւորութիւնը:

Տաշքենդում ԱՊՀ երկրների երկաթուղային տրանսպորտի հարցով 81-րդ նիստի շրջանակներում Զաքերին բանակցութիւններ է վարել Բելոզերովի հետ համագործակցութեան ամրապնդման եւ «Հիւսիս-Հարաւ» միջանցքի զարգացման շուրջ։

Զաքերին ընդգծել է Իրանի եւ Ռուսաստանի միջեւ ամուր կապերը՝ ասելով, որ կողմերի քաղաքական յարաբերութիւնները գտնւում են ամենաբարձր մակարդակի վրայ՝ յաւելելով, որ «Իրանի երկաթուղիներ» ընկերութիւնը ձգտում են ընդլայնել համագործակցութիւնը «Ռուսաստանեան երկաթուղիներ» ընկերութեան հետ։ Նա ընդգծել է «Հիւսիս-Հարաւ» միջանցքի նախագծի վրայ կենտրոնանալու կարեւորութիւնը:

Իր հերթին, Բելոզերովը նշել է, որ «Ռուսաստանեան երկաթուղիներ» ընկերութեան նպատակներից մէկը «Հիւսիս-Հարաւ» միջանցքի զարգացումն է՝ յաւելելով, որ արդէն 36 կոնտէյներային գնացք է ուղարկւել Պարսից ծոցի երկրներ՝ այդ ճանապարհով փոխադրումները սկսելու համար։ Բացի այդ, նա անդրադարձել է «Հիւսիս-Հարաւ» միջանցքով նաւթի եւ ածխի փոխադրման խոչընդոտների վերացման խնդրին եւ ընդգծել համապատասխան տուրքեր սահմանելու անհրաժեշտութիւնը։

Ռաշտ-Աստարա երկաթուղու կառուցման վերաբերեալ Բելոզերովն ասել է, որ այս նախագիծը առանձնայատուկ նշանակութիւն ունի Ռուսաստանի համար, եւ իրենք պատրաստ են համագործակցել ընդհանուր նպատակներին հասնելու համար։