Յորդորում ենք անյայտ կորածների հարցը եւ հայ գերիների ազատ արձակումը դարձնել Բաքւում Ձեր քննարկումների առանցքային թեմաները

Արցախի նախկին ՄԻՊ եւ նախկին պետնախարար Արտակ Բեգլարեանը յայտնել է, որ Արցախի ՄԻՊ Գեղամ Ստեփանեանի հետ համատեղ, նամակ են ուղարկել ԱՄՆ փոխնախագահ Ջէյ Դի Վենսին՝ նրա ուշադրութիւնը հրաւիրելով ոչ միայն պատանդների խնդրի, այլ նաեւ անյայտ կորած անձանց ճակատագրերի պարզման հարցի վրայ։

«Ստորեւ ներկայացնում եմ նամակը, որը Սպիտակ տան պաշտօնական ընթացակարգով ուղարկւել է փոխնախագահ Վենսի գրասենեակ։ Նամակ ԱՄՆ փոխնախագահ Ջէյ Դի Վենսին Արցախի (Լեռնային Ղարաբաղի) մարդու իրաւունքների պաշտպաններ Գեղամ Ստեփանեանից եւ Արտակ Բեգլարեանից

Յարգելի՛ պարոն փոխնախագահ, Մենք ողջունում ենք Ձեր դիւանագիտական առաքելութիւնը մեր տարածաշրջան։ Այս այցը տեղի է ունենում նախագահ Թրամփի կողմից հաստատւած խաղաղութեան գործընթացի վճռորոշ պահին։ Որպէս Արցախի (Լեռնային Ղարաբաղի) մարդու իրաւունքների պաշտպաններ՝ մենք շեշտում ենք, որ «Միջազգային խաղաղութեան եւ բարօրութեան Թրամփի ուղու» (TRIPP) յաջողութիւնը եւ 2025 թւականի օգոստոսի Վաշինգտոնեան գագաթնաժողովի արդիւնքները մեծապէս կախւած են խորը հումանիտար վէրքերի ապաքինումից։ Մինչ քաղաքական համաձայնագրերը նախաստորագրւում են, հարիւրաւոր հայ ընտանիքներ, որոնց հարազատներն անհետացել են 2023, 2020 եւ 1990 թւականների ադրբեջանական ագրեսիաների ժամանակ, շարունակում են մնալ տանջալից անորոշութեան մէջ։ Անյայտ կորած անձանց հարցում Բաքւի կողմից համագործակցութեան մշտական բացակայութիւնը երկրորդական խնդիր չէ. այն տարածաշրջանային լարւածութեան հիմնական աղբիւրներից է եւ հարազատների ճակատագիրն իմանալու մարդու հիմնարար իրաւունքի կոպտագոյն խախտում։ Կայուն խաղաղութիւն չի կարող կառուցւել «անյայտ ճակատագրերի» հիմքի վրայ։ Մենք խնդրում ենք, որ ԱՄՆ վարչակազմը ստանձնի առաջամարտիկի դեր հետեւեալ հարցերում.

• Ստեղծել չէզոք, տւեալ մեխանիզմ՝ մարտական գործողութիւնների եւ Լեռնային Ղարաբաղում տեղի ունեցած վառելիքի պահեստի պայթիւնի ժամանակ անյայտ կորածների գտնւելու վայրը պարզելու եւ նրանց նոյնականացնելու համար։
• Ապահովել լիակատար թափանցիկութիւն եւ ադրբեջանական կողմի համագործակցութիւնն անձանց կամ նրանց աճիւնների որոնման եւ հայրենադարձման հարցում։
• Յստակ յանձնառութիւն ստանձնել, որ անյայտ կորածների ճակատագրերի յստակեցումը կը դիտարկւի որպէս անհրաժեշտ պայման տարածաշրջանային նախագծերի լիարժէք իրականացման համար։ Անյայտ կորածների հարցում յստակութեան անհրաժեշտութեանը լրացնում է Բաքւում դեռեւս բանտարկւած 19 հայերի հրատապ խնդիրը։

Նրանց շարունակւող գերութիւնը, որն ուղեկցւում է շինծու դատավարութիւններով եւ հէնց այս ամսում կայացւած ցմահ դատավճիռներով, մարդասիրական յստակ խոչընդոտ է, որը պէտք է յաղթահարւի։ Այս անձանց ազատութեան ապահովումը պարզագոյն եւ ամենաարդիւնաւէտ քայլն է, որը Միացեալ Նահանգները կարող է իրականացնել՝ ապացուցելու համար, որ խաղաղութեան այս գործընթացը խարսխւած է արդարութեան, այլ ոչ թէ լոկ յարմարւողականութեան վրայ։ Սա հանրային վստահութիւն ձեւաւորելու ամենաուղիղ եւ կարճ ճանապարհն է, որպէսզի հայ ժողովուրդը հաւատայ խաղաղութեան օրակարգին։

Առանց այս հիմնարար մարդասիրական քայլերի, տարածաշրջանային ենթակառուցւածքային նախագծերը կը զրկւեն երկարատեւ կայունութեան համար անհրաժեշտ հասարակական հիմքից։

Այլ բաժնում նա գրել է. «Մենք յորդորում ենք Ձեզ անյայտ կորածների հարցի հանգուցալուծումը եւ բոլոր հայ գերիների ազատ արձակումը դարձնել Բաքւում Ձեր քննարկումների առանցքային թեմաները»:

Yerkir.am