Արաղչի. «Իրանը երկխօսութեան կողմնակից է երկրների միջեւ խաղաղութեան հաստատման համար»
«ԱԼԻՔ» – «Իրանը երկխօսութեան կողմնակից է երկրների միջեւ խաղաղութեան հաստատման համար»: Այս մասին, ՄԱԿ-ի քաղաքակրթութիւնների դաշինքի համաշխարհային ասամբլեայի 10-րդ համագումարի ժամանակ յայտարարել է ԱԳ նախարար Սէյէդ Աբբաս Արաղչին:
Ներկայացնելով խաղաղութեան եւ տարածաշրջանային իրադարձութիւնների կապակցութեամբ Իրանի Իսլամական Հանրապետութեան տեսակէտները, եւ անդրադառալով իրանական մշակոյթի եւ քաղաքակրթութեան մէջ հանդուրժողականութեան եւ համակեցութեան դերին եւ նշանակութեանը, Արաղչին ՄԱԿ-ի քաղաքակրթութիւնների դաշինքի համաշխարհային ասամբլեան համարել է տարբեր ազգերի եւ մշակոյթների միջեւ համագործակցութեան եւ համակեցութեան շեշտաւորման լաւագոյն հարթակներից մէկը:
«Իրանի Իսլամական Հանրապետութիւնը համոզւած է, որ խաղաղութեանն ու համակեցութեանը վերադառնալու միակ ճանապարհը քաղաքակրթութիւնների միջեւ երկխօսութեան եւ փոխգործակցութեան աւանդոյթների վերակենդանացումն է: Պէտք է կենտրոնանալ ընդհանրութիւնների վրայ եւ ամրապնդել ընդհանուր մարդկային արժէքները՝ պառակտման ու թշնամանքի փոխարէն»,- ասել է նա:
Իր ելոյթում անդրադառնալով Պաղեստինի ժողովրդի ցեղասպանութեանը եւ մարդկային ողբերգութեանը, Իրանի ԱԳՆ ղեկավարը խստօրէն դատապարտել է միջազգային կառոյցների անգործութիւնը Սիոնիստական ռեժիմի 14 ամիս շարունակւող յանցագործութիւնների ընթացքում. «Սիոնիստական ռեժիմի ոճրագործութիւնն ու դաժանութիւնը միջազգային հանրութեանը լուրջ փորձութեան է ենթարկել, եւ միջազգային կառոյցները, ՄԱԿ-ի Անվտանգութեան խորհուրդը, Արդարադատութեան միջազգային դատարանը եւ Միջազգային քրէական դատարանը, չեն կարողացել կատարել իրենց հիմնարար պարտականութիւնները ստեղծւած լուրջ մարտահրաւէրների դէպքում»,- յայտարարել է Արաղչին:
«Պատմութիւնը փաստել է, որ արդարութիւնը, ճշմարտութիւնն ու համակեցութիւնը միշտ յաղթել են ճնշումներին: Եկէք դասեր քաղենք մեր ընհանուր անցեալից եւ յանձնառու մնանք այն ապագային, որտեղ քաղաքակրթութիւնները կը գործակցեն ողջ մարդկութեան բարօրութեան համար»,- եզրափակել է Արաղչին:
