Վարուժան Գեղամեան. «Ոչ մի զիջում չի բաւարարում ու զսպում Ադրբեջանին»
«ԱԼԻՔ» – Թուրքագէտ Վարուժան Գեղամեանը ֆէյսբուքեան իր էջում գրառում է կատարել՝ անդրադառնալով վերջին շրջանում Ադրբեջանի կողմից զէնքի գնումների ծաւալի կտրուկ աճին:
«Լրագրող Դաւիթ Գալստեանը բաց աղբիւրների հետախուզութեան հիման վրայ ցոյց է տալիս, որ վերջին շաբաթներին Ադրբեջանը կրկնապատկել է զէնքի գնումն ու տեղափոխումը Ադրբեջան։
Սա հնարաւոր ռազմական յարձակման նախանշաններից է։
Ընդորում՝ այն պայմանաւորւած չէ միայն ժամանակով, այլ վկայում է այն մասին, որ Ադրբեջանի ռազմաքաղաքական ղեկավարութիւնը ռազմական ճնշման գործիքը դիտարկում է որպէս հիմնականներից մէկը Հայաստանի դէմ իր վարած տոտալ պատերազմում։
Սա փաստում է, որ.
-Ոչ մի «խաղաղութեան բանակցութիւն» չի փոխում Ադրբեջանի տրամադրւածութիւնն ու նպատակները,
-ոչ մի զիջում չի բաւարարում ու զսպում Ադրբեջանին,
-զիջումները, պայքարից հրաժարումը, ընդհակառակը, աւելի են գրգռում Ադրբեջանին ու հեշտացնում յաջորդ ճնշումը։
Մօտ հեռանկարում ներկայումս վարւող այս արտաքին ու անվտանգային քաղաքականութիւնը յանգեցնելու է աւելի խորը ճգնաժամի։
Սա է միակ ու գլխաւոր օրակարգը։
Այլընտրանքը՝ նոր ռազմաքաղաքական դաշինքի բանակցում է տարածաշրջանի երկրների հետ»,- գրել է նա:
