Արմէն Աշոտեան. «Փաշինեանը չունի ոչ մի իրաւունք՝ Հայաստանի կամ, առաւել եւս, Արցախի անունից ԵԱՀԿ Մինսկի խումբը լուծարելու համաձայնութիւն տալ»

«ԱԼԻՔ» – ՀՀԿ փոխնախագահ, քաղբանտարկեալ Արմէն Աշոտեանը հեռավար կարգով պատասխանել է քաղաքացիների հարցերին:

«Ի՞նչ կասէք Ալիեւի վերջին հարցազրոյցի եւ Նիկոլի արձագանգի մասին» հարցին ի պատասխան՝ Արմէն Աշոտեանը նշել է․

«Ակնյայտ էր, որ Ալիեւի հարցազրոյցն ադրբեջանական կողմի ծրագրաւորւած նախաձեռնութիւն էր։ Հիմնական շարժառիթը Մոսկւայի աչքերին լոյալութեան թոզ փչելն էր, յատկապէս՝ Սիրիայի իրադարձութիւնների ֆոնին Ռուսաստան-Թուրքիա յարաբերութիւնների ծանրացման պարագայում։ Ալիեւը փորձում էր ռուսներին հաճելի մի քանի շեշտադրումներով որոշակիօրէն տարանջատւել Էրդողանի հերթական «нож в спину» խաղից։

Պաշտօնական Մոսկւան գուցէ հրապարակաւ ընդունի այդ խաղը, բայց դժւար թէ լուրջ մարդիկ այնտեղ չհասկանան, որ Էրդողան-Ալիեւ զոյգն իրականում «երկդիմի Յանուս» է։

Կասկած չունեմ, որ առաջին իսկ հնարաւորութեան դէպքում Բաքուն անթաքոյց հրճւանքով Մոսկւային կը հասցնի «удар ниже пояса»։ Հայաստանի մասով ալիեւեան հանդուգն խօսոյթը նրա գլոբալ ռեւերանսների լոկալ շարունակութիւնն էր՝ Հայաստան-Ռուսաստան գլորւող յարաբերութիւնների ֆոնին՝ «չխառնւես, թող ես դրա հարցերը լուծեմ» տրամաբանութեան մէջ։

Ինչ վերաբերում է Նիկոլի արձագանգին, ապա այն ամբողջութեամբ անհամարժէք էր, անլիարժէք եւ վտանգաւոր՝ Փաշինեանի որդեգրած եւ իրականացւող գծի շրջանակներում։ Պասերով խաղը նրանց մէջ շարունակւում է։ Եթէ առաջին խաղակեսում գնդակի դերում Արցախն էր, ապա հիմա Հայաստանն է»։

Դիտարկմանը՝ «Փաշինեանը կոնստրուկտիւ է վերաբերւում ԵԱՀԿ Մինսկի խումբը լուծարելու՝ Բաքւի վերջնագրին», Աշոտեանն արձագանգել է.

«Արցախի հարցի վերջնական կարգաւորման միջազգային մանդատ ունեցող միակ լեգիտիմ ձեւաչափը լուծարելու Ալիեւի հետեւողական պահանջը ոչ թէ կապրիզ է, այլ իմ մատնանշածի յստակ գիտակցում։

Նիկոլի պրիմիտիւ լեզւով ասած՝ ԵԱՀԿ Մինսկի խումբը Արցախի հարցի կադաստրի գլոբալ վկայականն է։ Փաշինեանը չունի եւ ոչ մի իրաւունք Հայաստանի կամ, առաւել եւս, Արցախի ժողովրդի անունից այն լուծարելու համաձայնութիւնը սակարկել իր իսկ պատճառով առաջացած ինչ-որ խնդիրներ սքողելու կամ Բաքւից դատարկ խոստումներ ստանալու դիմաց։

Արցախի Հանրապետութեան պատկան մարմինները՝ նախագահը, ԱԺ-ն, ԱԳՆ-ն, ուղղակի պարտաւոր են յստակ եւ բարձրաձայն դիրքաւորւել այս հարցով։ Յատկանշական է, որ ԵԱՀԿ Մինսկի խմբի եւ ոչ մի համանախագահ երկիր, անկախ սուր տարաձայնութիւններից,  հրապարակաւ եւ ուղղակիօրէն չի սատարել այդ առաջարկը՝ սլաքներն ուղղելով Հայաստանի վրայ։

Իսկ Նիկոլն այս հարցում ունի նաեւ անձնական շահագրգռւածութիւն։ Մինսկի խմբի լուծարումը պատմութեան գիրկը կուղարկի կարգաւորմանը վերաբերող ողջ փաստաթղթային փաթեթը, այդ թւում՝ «Սերժի ժառանգութիւն» համարւող Արցախի ժողովրդի ինքնորոշման իրաւունքի ճանաչման եւ իրացման երաշխաւորւած մեխանիզմները, որոնցից 2018-ին հրաժարւելով, Նիկոլն Արցախն Ադրբեջանին յանձնելու ստարտը տւեց»։