Գերմանիայի կանցլերի թեկնածու. «Ուկրաինա գերմանացի խաղաղապահներ ուղարկելը հնարաւոր է միայն ՌԴ համաձայնութեամբ»

«ԱԼԻՔ» – Քրիստոնեայ-դեմոկրատական միութեան (ՔԴՄ) նախագահ, Բունդեսթագի CDU/CSU խմբակցութեան ղեկավար եւ Գերմանիայի կանցլերի թեկնածու Ֆրիդրիխ Մերցը կարծում է, որ գերմանացի խաղաղապահներ Ուկրաինա ուղարկելը հնարաւոր է միայն միջազգային մանդատով եւ Ռուսաստանի համաձայնութեամբ։ Այս մասին քաղաքական գործիչը յայտարարել է dpa-ին տւած հարցազրոյցում։

«Եթէ կայ խաղաղութեան համաձայնագիր, եւ եթէ Ուկրաինային երաշխիքներ են պէտք դա ապահովելու համար, ապա դա կարող է քննարկւել միայն այն դէպքում, եթէ դրա համար լինի ոչ վիճելի մանդատ՝ միջազգային իրաւունքին համապատասխան։ Ես դա չեմ տեսնում այս պահին»,- ասել է Մերցը: «Ես կը ցանկանայի, որ այս մանդատը կոնսենսուսի մէջ լինէր Ռուսաստանի հետ, այլ ոչ թէ կոնֆլիկտի մէջ»:

Մերցին հարցրել են, թէ ՆԱՏՕ-ին անդամակցելուց բացի Ուկրաինայի անվտանգութեան ի՞նչ երաշխիքներ կարող է պատկերացնել։

«Ես այսօր չեմ պատկերացնում, որ ինչ-որ բան գնայ այդ ուղղութեամբ, քանի որ մենք հեռու ենք նման զինադադարից։ Սրանք բոլորը հարցեր են, որոնք պէտք է յստակեցւեն առաջիկայ մի քանի շաբաթների, իսկ գուցէ ամիսների ընթացքում»,- պատասխանեց նա։

Գերմանացի քաղաքական գործչի խօսքով՝ ինքը ցանկանում է որքան հնարաւոր է շուտ խաղաղութեան հասնել Ուկրաինայում։

Նա նաեւ անհամաձայնութիւն է յայտնել Գերմանիայի կանցլեր Օլաֆ Շոլցի հետ, ով կարծում է, որ դրա պատճառով Բեռլինը չպէտք է գերմանական Taurus հրթիռներ մատակարարի Կիեւին։ Մերցի խօսքով՝ առնւազն երեք երկիր՝ ԱՄՆ-ը, Մեծ Բրիտանիան, Ֆրանսիան, արդէն իսկ Ուկրաինայի զինւած ուժերին մատակարարել են նմանատիպ զինատեսակներ։

Մերցի կարծիքով՝ Դոնալդ Թրամփի Սպիտակ տուն վերադառնալով ԱՄՆ քաղաքականութիւնն Ուկրաինայի նկատմամբ կտրուկ կը փոխւի, գրում է Deutsche Welle-ն։

«Միգուցէ նա կասի՝ ես այլ բան չեմ անի։ Դուք ինքներդ էք հոգում այս մասին: Կամ գուցէ նա կասի. «Ես հիմա այնքան կը զինեմ Ուկրաինային, որ ռուսները հրաժարւեն պատերազմից»,- ասաց գերմանացի քաղաքական գործիչը։

Նրա խօսքով, Գերմանիան ԵՄ-ի եւ Մեծ Բրիտանիայի հետ միասին պէտք է «ռազմավարութիւն մշակի, թէ ինչպէս ենք վարւելու յունւարի 20-ից յետոյ Ամերիկայի հնարաւոր սցենարների հետ»։

Հարցին, թէ Մերցը՝ որպէս կանցլեր, կաջակցի՞ Ուկրաինային օգնութեան ֆինանսաւորման նոր յատուկ հիմնադրամին, նա բացասական է պատասխանել։ Դրա արժէքը պէտք է «ֆինանսաւորւի ընթացիկ բիւջէից, նոր պարտք չպէտք է լինի»,- յաւելել է Մերցը: