Տիգրան Աբրահամեան. «Դրսում փիսիկ խաղացող իշխանութիւնը, ներսում աչքի է ընկել բռնապետական մեթոդներով»
«ԱԼԻՔ» – «Պատիւ ունեմ» խմբակցութեան քարտուղար Տիգրան Աբրահամեանը գրել է.
«Հայաստանի շուրջ ահագնացող սպառնալիքներին Հայաստանի իշխանութիւնը դիմակայելու որեւէ ռեսուրս չի կուտակում:
Աւելին, այն կառոյցները, որոնք գործառոյթների կամ աւանդոյթների բերումով ապահովում են երկրի դիմադրողականութիւնը` գործող իշխանութեան յամառ ջանքերով շարքից հանւել են կամ էապէս թուլացւել:
Ի հեճուկս դրսում փիսիկ խաղալու իշխանութեան կեցւածքին, ներսում սրանք ամբողջութեան մէջ աչքի են ընկել բռնապետական մեթոդներով, լպիրշութեամբ, անարդիւնաւէտ կառավարմամբ:
Նոյնիսկ հանրութեան տեսանկիւնից արտաքուստ դրական թւացող նախաձեռնութիւնները կիսատ-պռատ են մնացել կամ ձախողւել, որովհետեւ պրոցեսները կա´մ մինչեւ վերջ չեն տարւել կա´մ դրանց ապահովումն իրականացնողները «գցել են ոտքներին»:
Կարճ ասած, սրանք իրենց արած-չարածով երկիրը զինաթափել են, դրա համար էլ ողջ տարի հանրութեանը համոզում էին, որ ճիշտը Հայաստանին առաջադրւած օկուպացիոն պահանջներն ընդունելն է, իսկ պայքարելու իմաստ չկայ»:
