Հայաստանի Ժուռնալիստների միութիւնը. «Այս իշխանութիւնը հատել է բոլոր թոյլատրելի կարմիր գծերը»

«ԱԼԻՔ» – Այս իշխանութիւնը, որի գլխին երբեմնի լրագրողական ընտանիք է, թւում է, թէ պէտք է որ լաւ իմանար ու գիտակցէր մեդիադաշտի ֆունկցիոնալ առաքելութիւնը, սակայն իրենց վարած շւայտ կեանքի աղբիւրները հանրութիւնից գերգաղտնի պահելու մոլուցքից դրդւած՝ կորցրել են թէ՛ իրականութեան հետ կապը, եւ թէ՛ հատել բոլոր թոյլատրելի կարմիր գծերը: Այս մասին յայտարարութիւն է տարածել Հայաստանի Ժուռնալիստների միութիւնը:

«Այսպէս՝ ի պատասխան Panorama.am-ի՝ նախ ՀՀ կառավարութեանը, ապա Աննա Յակոբեանի գլխաւորած «Իմ քայլը» հիմնադրամին ուղարկւած գրաւոր հարցման, որով լրատւամիջոցն իշխանութիւններից ընդամէնը փորձել էր պարզել՝ որքա՞ն գումար է ծախսւել Աննա Յակոբեանի՝ Իտալիա կատարած այցի համար՝ խնդրելով տրամադրել ծախսերի բացւածքը, այդ թւում` վերադարձի ժամանակ ինքնաթիռի տոմսերի համար վճարւած գումարը, հիւրանոցում կեցութեան գումարը, թանգարանների տոմսերի գումարը, ի՞նչ աղբիւրներից են կատարւել ծախսերը, որքա՞ն գումար է տրամադրւել պետական բիւջէից, եւ Նիկոլ Փաշինեանի կնոջ Իտալիա այցն ի՞նչ էական, շօշափելի արդիւնքներ է ապահովել Հայաստանի համար, լրատւամիջոցը ստացել է մի պատասխան, որը, մեղմ ասած, յարիր չէ պետութեան ղեկավարի կնոջ անւան հետ կապւող կազմակերպութեանը:

«Ի պատասխան Ձեր հարցման առաջարկում ենք մասնակցել «Իմ Քայլը» բարեգործական հիմնադրամի «Կրթւելը նորաձեւ է» նախաձեռնութեան շրջանակներում մեկնարկած «Հաղորդակցութեան հմտութիւններ» դասընթացների շարքին եւ մասնագիտական վերապատրաստման դասընթացներին, որը թոյլ կը տայ ձեռք բերել նոր գիտելիքներ եւ տարանջատել, թէ որ կառոյցին ու ում ինչ հարց կարելի է ուղղել եւ հարցումը ձեւակերպելիս որ դէպքերում կարելի է յղում կատարել «Տեղեկատւութեան ազատութեան մասին» ՀՀ օրէնքին»,- ցինիզմի այս նոր որակը, փաստօրէն, իրենց «ժողովրդավարութեան բաստիոն» հռչակած իշխանութեան համար համարւում է օրինաչափ:

Լրատւամիջոցն իրաւունք ունի եւ պարտաւոր է հանրութեանը մատուցել ճշտւած տեղեկութիւններ, եւ հէնց այդ նկատառումով է դիմել իրաւասու կառոյցներին՝ ցանկանալով իր ընթերցողին ներկայացնել ճշգրիտ թւեր, բայց Աննա Յակոբեանը թերեւս չի ցանկանում, որ հանրութիւնն իմանա իրականութիւնը:

Կասկած չունենք, որ «Իմ քայլը» հիմնադրամի կողմից տրւած պատասխանի բովանդակութեան հեղինակն անձամբ Աննա Յակոբեանն է, որը փորձել է մեդիագրագիտութեան դասեր տալ լրագրողին՝ խուսափելով ներկայացնել ծախսւած միլիոնների մասին հաշւէտւութիւնը:

Յատկանշական է, որ պատասխանատու լրատւամիջոցին մեդիագրագիտութեան դասեր է տալիս մէկը, ում ընտանեկան կայքը չի փայլում մեդիագրագիտութեամբ, ում օգնականն իրապէս մեդիաաղբ տարածող Perfect.TV-ի ձայնն է՝ Ստելլա Սարուխանեանը, իսկ ամուսնու աշխատակազմի ղեկավարի տեղակալի՝ Տարօն Չախոյեանի անունը կապւում է Medianews.am ապատեղեկատւութիւն ու լրագրութեան հետ օրգանական առնչութիւն չունեցող, յաճախ ամենապիղծ յօդւածներ տարածող կայքի հետ:

Բայց «Քաղաքացիական պայմանագիր» կուսակցութիւնում թերեւս պարտադիր է ընդօրինակել մեդիայի հետ Փաշինեան զոյգի յարաբերւելու կերպը: Այլ կերպ հնարաւոր չէ բացատրել իրականութեան հետ առերեսւել չցանկացող, բաց աղբիւրներից օգտւած ու իր ենթադրեալ կոռուպցիոն գործարքների մասին հրապարակումներ կատարող լրատւամիջոցներին դատի տալու հակում ունեցող Երեւանի քաղաքապետ Տիգրան Աւինեանի վերջին անզուսպ խօսքը լրատւամիջոցների հասցէին Հայկ Մարութեանի հետ տրանսպորտի սակագների հարցով բանավէճի ժամանակ:

«Ֆակտոր» ՀԸ-ի եթերում նախկին քաղաքապետ Հայկ Մարութեանի հետ բանավէճում Աւինեանը, արձագանգելով Մարութեանի՝ իրեն ուղղւած մեղադրանքներին եւ «ՍիվիլՆեթի» ու OCCRP-ի վկայակոչւած յօդւածին, ասել է, թէ արդէն իսկ դատական հայց կայ «ՍիվիլՆեթի» դէմ, եւ իր հօրը յորդորել է նման մի հայց եւս ներկայացնել։

Բանավէճի ժամանակ Աւինեանը յայտարարել է, թէ «մեդիան դարձել է մի մեծ աղբանոց», ապա հաղորդավարի ճշտող հարցին ի պատասխան՝ նշել՝ «որոշ մեդիաներ»՝ նկատի ունենալով նախ «Սիվիլնեթի»  հրապարակումը, որի առնչութեամբ, իհարկէ, դատի է տւել լրատւամիջոցին, մինչդեռ յօդւածը սուտ որակելով՝ Աւինեանը չի ներկայացրել որեւէ հերքող փաստարկ:

Հայաստանի ժուռնալիստների միութիւնը խստօրէն դատապարտում է կառավարող քաղաքական ուժի ու նրա հետ աֆիլացւած անձանց՝ սահմաններ չճանաչող վարքագիծը լրատւամիջոցների նկատմամբ:

Մամուլը թիրախաւորելու նւազագոյն փորձն անգամ դատապարտելի է: Պատասխանատու լրատւամիջոցները լաւ գիտեն իրենց գործը եւ ամէն ինչ անում են՝ իրենց ընթերցողներին ճշմարտացի ու ճշտւած տեղեկատւութիւն տրամադրելու համար՝ ի տարբերութիւն Նիկոլ Փաշինեանի մերձաւորների կողմից տիրապետւող կայքերի ու իւթուբեան ալիքների կողմից դաշտ նետւած տարատեսակ իրապէս լրատւական աղբի:

Հայաստանի ժուռնալիստների միութիւնն իշխանութեան անզուսպ վարքագծի հերթական դրսեւորման, խօսքի ազատութեան, լրատւամիջոցների դէմ ընթացող այս իրավիճակը կը ներկայացնի միջազգային գործընկեր կազմակերպութիւններին:

Տիգրան Աւինեանը պէտք է հրապարակային ներողութիւն խնդրի լրատւամիջոցների հասցէին արւած որեւէ ողջամիտ բացատրութիւն չունեցող արտայայտութեան համար»,- ասւած է յայտարարութեան մէջ: