Գառնիկ Դանիէլեան. «Փաշինեանի տխրահռչակ «բանաւոր ըմբռնումներից» հերթականը․Ադրբեջանը մխրճւելու է մեր տարածք»

«ԱԼԻՔ» – ԱԺ «Հայաստան» խմբակցութեան պատգամաւոր Գառնիկ Դանիէլեանը ֆէյսբուքեան իր էջում գրում է.

«Մինչ հասարակութիւնն արդարացիօրէն քննարկում է Ալիեւի հերթական սպառնալիքներն ու վերջնագրերը, իսկ իշխանութիւնը շարունակում է իր շոուները, առկայ է Ալիեւ-Փաշինեան նոր պայմանաւորւածութիւն, Փաշինեանի տխրահռչակ «բանաւոր ըմբռնումներից» հերթականը, որի համաձայն, տխրահռչակ GPS-ի հիմքի վրայ կրկին Տաւուշում, այս անգամ՝ Կիրանց-Ոսկեպար ճանապարհահատւածի մի քանի մասերում, Ադրբեջանը մխրճւելու է մեր տարածք։

Այս ամէնի հետեւանքով թշնամին մի քանի հատւածներում վերահսկողութեան տակ է վերցնելու Երեւան-Թբիլիսի միջպետական ճանապարհը՝ ռազմավարական եւ անվտանգութեան իմաստով վերստեղծելով լրջագոյն մարտահրաւէրներ։

Զբաղեցնելով կարեւորագոյն դիրքեր՝ Ադրբեջանը Հայաստանի Հանրապետութիւնը դարձնելու է է՛լ աւելի խոցելի։

Իմ նշած տեղեկութեան իսկութիւնը փաստում է հենց Ալիեւի յայտարարութիւնն առ այն, որ իր առաջարկով (պարտադրանքով) յունւարին տեղի է ունենալու սահմանազատման յանձնաժողովների նիստ։

Ակնյայտ է, որ Ալիեւի նպատակն է հերթական շանտաժների, սպառնալիքների ու վերջնագրերի միջոցով կորզել հերթական զիջումներ, նւաճել ռազմավարական նշանակութեան նոր տարածքներ, կարեւորագոյն դիրքեր, մի քանի հատւածներում վերահսկել միջպետական ճանապարհը եւ այլն։ Սա կարող է մատուցւել փաշինեանական «եթէ չտանք՝ պատերազմ կը լինի» կամ «սահմանների ճշգրտում» տխրահռչակ պատճառաբանութիւնների սուոսով:

Կարեւոր է, որ հանրութիւնը լինի զգօն, եւ հնարաւոր զարգացումների դէպքում պէտք է պատրաստւենք դիմադրութեան՝ հերթական հայրենայանձնումը կանխելու համար։

Նշւած գործընթացի վերաբերեալ կը տեղեկացնեմ լրացուցիչ»։ Հաղորդել է yerevan.today-ը: