Տիգրան Աբրահամեան. «Փաշինեանի «երկաթեայ» տրամաբանութեամբ՝ որքան պարտւենք, այնքան մեր անկախութիւնը կամրապնդւի»
«ԱԼԻՔ» – «Փաշինեանը ներկայացնում է ՀՀ-ի հեռանկարը` գուժելով ոչ միայն նոր պարտութիւնների մասին, այլ աւանսով փորձում է արդարացնել դրանում իր մեծ «ջանքերը»»։ Անդրադառնալով նախօրէին ամերիկահայ համայնքի «ներկայացուցիչներ»-ի հետ հանդիպման ընթացքում Նիկոլ Փաշինեանի յայտարարութիւններին՝ ֆէյսբուքեան իր էջում գրել է ՀՀԿ անդամ, ՀՀ ԱԺ «Պատիւ ունեմ» խմբակցութեան քարտուղար Տիգրան Աբրահամեանը։
«Որքան էլ առաջին հայեացքից հասարակութեան որոշ խմբերի համար տարօրինակ հնչի, սակայն գործող իշխանութեան տրամաբանութեամբ, որքան շատ պարտութիւններ լինեն, այնքան մեծ է հաւանականութիւնը, որ Հայաստանը «ճիշտ ճանապարհ» կընտրի:
ԱՄՆ-ում Հայաստանի պարտութեամբ հպարտացող Փաշինեանը նշել է, թէ «Մենք, իմ գնահատմամբ, այսօր այդ պարտութեան (44-օրեայ պատերազմի) միջով անցնելով ձեռք ենք բերել անկախ, ինքնիշխան պետութիւն ունենալու հնարաւորութիւն:
Փաստօրէն, ըստ Փաշինեանի «երկաթեայ» տրամաբանութեան, որքան շատ պարտւենք այնքան մեր անկախութիւնն ու ինքնիշխանութիւնը կամրապնդւի:
Չշտապէք զւարճանալ, առաւել եւս` սրան գիժ կամ մոլագար անւանէք:
Փաշինեանը ներկայացնում է Հայաստանի հեռանկարը` գուժելով ոչ միայն նոր պարտութիւնների մասին, այլ աւանսով փորձում է արդարացնել դրանում իր մեծ «ջանքերը»»,- գրել է նա։
