Հութիներն առաջին անգամ «երկիր-օդ» հրթիռներ են արձակել ԱՄՆ ռազմաօդային ուժերի ուղղութեամբ
«ԱԼԻՔ» – Եմէնի հութիները փետրւարի 19-ին առաջին անգամ «երկիր-օդ» հրթիռներ են արձակել ամերիկեան F-16 կործանիչի ուղղութեամբ, Fox News-ին յայտնել են ԱՄՆ պաշտպանութեան երեք բարձրաստիճան պաշտօնեաներ:
Ինքնաթիռը թռչում էր Եմէնի ափերի վրայով, երբ հրթիռ է արձակւել, սակայն այն բաց է թողել ինքնաթիռը։
Փետրւարի 19-ին հութիները մէկ այլ հակաօդային պաշտպանութեան հրթիռ են արձակել ամերիկեան MQ-9 Reaper անօդաչու թռչող սարքի ուղղութեամբ, որն ԱՄՆ-ն արձակում էր Եմէնի վրայով Հութիների վերահսկողութեան տակ գտնւող տարածքներից դուրս:
News.am-ի համաձայն՝ մինչ այժմ ԱՄՆ ռազմածովային ուժերը խոցել կամ որսացել են հութիների կողմից իր ռազմանաւերի վրայ արձակւած իւրաքանչիւր հրթիռ եւ անօդաչու թռչող սարք, սակայն երբեմն որսումները տեղի են ունեցել հարւածից վայրկեաններ առաջ:
Սա առաջին դէպքն էր, երբ հութիները հակաօդային պաշտպանութեան հրթիռ էին արձակել ամերիկեան F16 կործանիչի ուղղութեամբ, ինչը զգալի էսկալացիա էր, ասել են ԱՄՆ պաշտպանութեան բարձրաստիճան պաշտօնեաները:
Բարձրաստիճան զինւորականները կարծում են, որ միայն ժամանակի հարց է, երբ հութիների հրթիռը կը հարւածի ԱՄՆ ռազմածովային ուժերի նաւին՝ պոտենցիալ վնասելով Կարմիր ծովում պարեկութիւն կատարող աւիակիրներին եւ կործանիչներին:
Ներկայումս ԱՄՆ-ում բանավէճ կայ այն մասին, թէ արդեօք աւելի աւանդական մօտեցում ցուցաբերել հութիների դէմ պայքարում, շարունակաբար թիրախաւորել նրանց, ովքեր ծրագրում եւ իրականացնում են շարունակւող յարձակումները, թէ՞ աւելի պաշտպանողական մօտեցում ցուցաբերել եւ շարունակել թիրախաւորել հութիների ենթակառուցւածքները եւ զէնքի պահեստները:
