Արաղչին հանդիպել է Հայաստանի ԱԳ նախարարին
«ԱԼԻՔ» – Զինաթափմանը եւ մարդու իրաւունքներին առնչւող միջազգային միջոցառումներին մասնակցելու նպատակով Շւէյցարիայում գտնւող Իրանի Իսլամական Հանրապետութեան արտաքին գործերի նախարար Սէյէդ Աբբաս Արաղչին հանդիպել է Հայաստանի արտաքին գործերի նախարարին:
Հանդիպմանը Արաղչին, մատնանշելով երկու երկրների ամուր եւ կայուն յարաբերութիւնները, ընդգծել է Իրանի Իսլամական Հանրապետութեան պատրաստակամութիւնը՝ ամրապնդելու յարաբերութիւնները երկու երկրներին հետաքրքրող բոլոր ոլորտներում: Քննարկւել են նաեւ հարաւկովկասեան տարածաշրջանի կայունութեան ու անվտանգութեան հարցում պաշտպանւածութեան շուրջ հարցեր,- յայտնել է արտգործնախարարութեան պաշտօնական լրահոսը:
Արաղչին նաեւ անհրաժեշտ է համարել, տարածաշրջանի պետութիւնների ինքնիշխանութեան պահպանումն ու տարածքային ամբողջականութիւնը, եւ ընդգծել, որ այս տարածաշրջանում անվտանգութիւնն ու կայունութիւնը պահանջում են շարունակական ներտարածաշրջանային համագործակցութիւն ու համակարգում, կարեւորելով ոչ կառուցողական միջամտութիւնների բացառումը:
Հայաստանի արտգործնախարարը եւս առանձնայատուկ կարեւորութեամբ է շեշտել երկու երկրների յարաբերութիւնների խորացման փաստը, բարձր գնահատելով Իրանի Իսլամական Հանրապետութեան սկզբունքային դիրքորոշումը Հայաստանի տարածքային ամբողջականութեան նկատմամբ, ինչպէս նաեւ աշխարհաքաղաքական առնչութեամբ տարածաշրջանի բոլոր երկրների զգայնութիւնները հաշւի առնող կեցւածքի համար։
Հայաստանի արտգործնախարարն ընդգծել է նաեւ Իրանի հետ յարաբերութիւնները տնտեսական, առեւտրային, մշակութային եւ տրանսպորտային բոլոր ոլորտներում ընդլայնելու Հայաստանի վճռականութիւնը։
