Ադրբեջանը շուտով Պակիստանից JF-17 Thunder կործանիչների առաջին խմբաքանակը կը ստանայ

«ԱԼԻՔ» – Ադրբեջանը շուտով կը ստանայ JF-17 Thunder կործանիչների առաջին խմբաքանակը Պակիստանից, յայտնում են ադրբեջանական լրատւամիջոցները։

Նշւում է, որ դրա մասին յայտնել է Պակիստանի տեղեկատւութեան նախարար Աթթա Թառարը։

«Շուտով Ադրբեջանը Պակիստանից կը ստանայ JF-17 Thunder կործանիչների առաջին խմբաքանակը, եւ ապագայում հնարաւոր է դրանց համատեղ արտադրութիւնը»,- ասել է Թառարը։

Ինչպէս հաղորդում են ադրբեջանական լրատւամիջոցները, Պակիստանի վարչապետ Շահբազ Շարիֆը, Ադրբեջանի նախագահ Իլհամ Ալիեւի հետ փետրւարի 24-ին Բաքւում մասնակցելով պակիստանա-ադրբեջանական գործարար համաժողովին, խօսել է երկու երկրների միջեւ պաշտպանական համագործակցութեան ամրապնդման կարեւորութեան մասին։

Նա նշել է, որ JF-17 կործանիչները եւս մէկ թանկարժէք արտադրանք են, որոնց շուրջ Պակիստանն ու Ադրբեջանը ակտիւօրէն համագործակցում են։

Աւելի վաղ հաղորդւել էր, որ նման կործանիչներ գնելու համար Ադրբեջանի պաշտպանութեան նախարարութիւնը պայմանագիր է կնքել Պակիստանի աւիացիոն համալիրի հետ։ Ըստ նրանց՝ պայմանագրի արժէքը 1,6 միլիարդ դոլար է, ներառում է նաեւ ռազմամթերքի մատակարարում եւ օդաչուների պատրաստութիւն։

JF-17C (Block III) տեսակի կործանիչների վերջին մոդիֆիկացիան է։ Ինքնաթիռը կարող է կրել տարբեր տեսակի 8 հրթիռ, ունի ժամանակակից ռադարներ եւ էլեկտրոնային պաշտպանական համակարգ։ Հաղորդում է news.am–ը: