Լիլիթ Գալստեան. «ՄԱԿ է գնացել՝ հեծանւի յայտնագործութեան գիւտով»
«ԱԼԻՔ» – ՀՅԴ Հայաստանի ԳՄ անդամ, ՀՀ ԱԺ «Հայաստան» խմբակցութեան պատգամաւոր Լիլիթ Գալստեանը ֆէյսբուքեան իր էջում գրառում է կատարել՝ անդրադառնալով ՄԱԿ-ի Գլխաւոր ասամբլեայի 79-րդ նստաշրջանում Նիկոլ Փաշինեանի ելոյթին:
«ՄԱԿ-ի Գլխաւոր վեհաժողովի 79-րդ նստաշրջանում, ուր Հայաստանի մարտահրաւէրների՝ գոյաբանական սպառնալիքի, ադրբեջանական չդադարող ռազմատենչ հռետորաբանութեան, Բաքւի բանտերում պատանդառւած Արցախի ռազմաքաղաքական ղեկավարութեան մասին խօսելու վայրն էր, ՀՀ-ն պաշտօնապէս ներկայացնողը գնացել էր հեծանւի յայտնագործութեան գիւտով։
Աշխարհն իրազեկւեց, որ «Ապագայ կայ, կայ ապագայ» եւ կարեւորը «պոզիտիւ» մտածելն է։ Իհարկէ, լաւ պրծանք՝ կարող էր օրինակ պոզիտիւի շարքից օղի քաշելու, խոզ խանձելու կամ խաշլամա պատրաստելու բաղադրատոմսով կիսւել։ Բայց դէ, իր պատկերացրած «Ապագայ կայ»-ն հէնց այս մասին է…
Այդ նոյն պահին Ալիեւը Բաքւում յայտարարում է, որ ինքն աշխարհին պարտադրեց ռազմական ճանապարհով, նոյնն է, թէ՝ ցեղասպանութեամբ, Արցախի հակամարտութեան լուծումը։ Յայտարարեց, որ պատրաստ է ցանկացած նոր յարձակման եւ ամէն քայլի։
Իսկ ահա այսօր Բայրամովը, օգտագործելով նոյն ամբիոնը, կոչ է ուղղում Հայաստանին քաղաքական կամքի եւ պատասխանատւութիւն դրսեւորել, արագ քայլեր ձեռնարկել՝ վերացնելու մնացած խոչընդոտները։ Բնականաբար, խօսքը Հայաստանի Սահմանադրութեան փոփոխութեան եւ Հայաստանից կորզւող նոր զիջումների մասին է։
Ապագայ կայ…
Ահա, թէ ինչու է քաղաքական մեծամասնութիւնը շտապում սահմանազատման կանոնակարգ հաստատել, սեփական ապազգային գործունէութեան եւ հայրենածախութեան պատասխանատւութիւնը գցել ԱԺ-ի վրայ, երբ Կիրանցում մեր տարածքները հատւածաբար տրւել են թշնամուն՝ առանց կանոնակարգ ու ապագայ, երբ ադրբեջանցու սապոգը դեռ շարունակում է օկուպացրած պահել 205 քառ․ կմ․ ՀՀ ինքնիշխան տարածքներ»,- գրել է նա:
