Իրանագէտ Մաջիդ Քարիմի. «Սիւնիքի հայաթափման պլանը ձախողելու համար ՀՀ-ն պէտք է առաջարկի Իրանին շտապ ռազմական համագործակցութեան պայմանագիր կնքել, Սիւնիքում ռազմաբազա տեղակայել»
«ԱԼԻՔ» – Իրանի համար Սիւնիքով միջանցքի տրամադրումն Ադրբեջանին եւ Թուրքիային անընդունելի է եւ կարմիր գիծ։ Նման միջանցքի բացումը բերելու է շատ կարճ ժամանակահատւածում ամբողջ Սիւնիքի հայաթափման, որն էլ Թուրքիայի եւ Ադրբեջանի իրական նպատակն է։
Այս մասին 168TV-ի «Ռեւիւ» հաղորդաշարի եթերում ասաց իրանագէտ, Կովկասի հարցերով աւագ փորձագէտ Մաջիդ Քարիմին։
«Այս պարագայում Սիւնիքի հայաթափում է ստացւում, դուք՝ հայերդ, ի՞նչ է, լաւ չէք ճանաչո՞ւմ Թուրքիայի մտածելակերպը։ Իրանի համար այս հարցը կարմիր գիծ է, որը որեւէ դէպքում չի փոխւելու։ Ադրբեջանին եւ Թուրքիային ճանապարհ տալուց առաջ Հայաստանի իշխանութիւնը պէտք է այդ ճանապարհի նշանակութիւնը շատ մանրամասն ուսումնասիրի. Սիւնիքի մարզի աշխարհաքաղաքական տեղն ու դիրքը տարբերւում են միւս ճանապարհներից։ Դա՛ է պէտք հասկանալ։ Թէ՛ օսմանցիները, թէ՛ Բաքւի մուսաւաթները մշտապէս յարձակումներ են գործել Մեղրիի տարածաշրջանի վրայ եւ առ այս պահն ունեն նման նկրտում, հետեւապէս՝ այդ ճանապարհին տիրանալու պարագայում կրկնւելու է Արցախի ճակատագիրը. յիշէ՛ք, որ Թուրքիան եւ Ադրբեջանը յարձակւեցին Արցախի վրայ, բայց խոստացան, որ Արցախի ժողովրդի հետ գործ չեն ունենալու, իսկ 3 տարի անց տեսանք, թէ ինչ պատահեց։ Նոյնը կրկնւելու է Սիւնիքում»,- ասաց Կովկասի հարցերով փորձագէտը։
Վերջինիս խօսքով՝ հայկական կողմը թուրքական մտածեակերպը լաւ չի ճաաչում, մի՞թէ տեսանելի չէ, որ եթէ ճանապարհը բացւի՝ թուրքերը կը գան, այդ ճանապարհի վրայ կիրականացնեն զինւած գործողութիւններ։
«Թուրքիան անմիջապէս այդ պատրւակով զօրք կը մտցնի այդ տարածք»,- շեշտեց Մաջիդ Քարիմին։
Որո՞նք պէտք է լինեն Հայաստանի քայլերը՝ կանխելու Սիւնիքով միջանցքի՝ ռազմական ճանապարհով բացումը՝ հարցին ի պատասխան, իրանագէտը նշեց մի քանի քայլ, որոնք Հայաստանի պարագայում պարզապէս անհրաժեշտութիւն են՝ թուրք-ադրբեջանական ռազմական նկրտումներն ու Հայաստանի հարաւի անեքսիան թոյլ չտալու համար։
«Հայաստանը պէտք է առաջարկի Իրանին շտապ ռազմական համագործակցութեան վերաբերեալ պայմանագիր կնքել, մասնաւորապէս՝ Սիւնիքում համատեղ գործունէութիւն ծաւալելու համար։ Երկրորդ կէտով՝ Հայաստանը պէտք է դիմի Իրանին՝ Սիւնիքում ռազմաբազա տեղակայելու խնդրանքով։ Երրորդ կէտով պէտք է Սիւնիքում ստեղծել տնտեսական զարգացման գօտիներ»:
Յիշեցնենք, որ Մաջիդ Քարիմին իրանագէտ է, Կովկասի հարցերով աւագ փորձագէտ։
Քարիմին ակտիւօրէն մասնակցել է միջազգային գիտաժողովների՝ ներկայացնելով զեկոյցներ՝ նւիրւած, մասնաւորապէս, Լեռնային Ղարաբաղի հակամարտութեան աշխարհաքաղաքական ազդեցութեանը, Մուղանի պատմութեանը եւ նրա Խորհրդային Հանրապետութեանը, ինչպէս նաեւ Իրանի եւ Հայաստանի մշակութային հատման կէտերին։
