«ԱԼԻՔ» – Իսլ. Յեղափոխութեան առաջնորդը, նշելով, որ Օմանի բանակցութիւնները արտգործնախարարութեան տասնեակ խնդիրներից մէկն է, հետեւողականութիւնն ու ջանքերի պակասը համարել է երկրի նպատակներին հասնելու ճանապարհից բացակայող օղակը: «Մենք ոչ ծայրայեղ լաւատես ենք, ոչ էլ ծայրայեղ հոռետես՝ Օմանի բանակցութիւնների նկատմամբ»,- ընդգծել է նա։
Գերագոյն առաջնորդը պետականութեան երեք մարմինների բարձրաստիճան պաշտօնեաների հետ հանդիպմանը ընդգծել է, որ պէտք է խուսափել Օմանի բանակցութիւնների արդիւնքների վերաբերեալ ծայրայեղ լաւատեսութիւնից կամ հոռետեսութիւնից. «Բոլոր ոլորտներում նպատակներին հասնելու երկրի գործունէութիւնը պէտք է շարունակւի աւելի հրատապ, եւ ոչինչ չպէտք է կապել բանակցութիւնների արդիւնքների հետ»։ Այս մասին է տեղեկացրել գերագոյն առաջնորդի մամլոյ ծառայութեան կենտրոնը:
Այաթ. Խամենէին յաւելել է. «Երկրում առկայ են լաւ օրէնքներ, կանոնակարգեր եւ անհրաժեշտ ծրագրեր, սակայն մեզ՝ հետեւողականութեան բացակայութիւնն է, որ խոչընդոտում է իրականացնել նպատակները: Բենզինի մեծաքանակ սպառման փաստն ու սպառման մշակոյթի բացը, կրթական համակարգում առիթների ու հնարաւորութիւնների անբաւարար բախշումը, եւ նմանօրինակ խնդիրները, որոնց հետ առընչւում են, յատկապէս, հասարակութեան թոյլ խաւերը, լուծելի են հետեւողական ու համակարգւած աշխատանքով միայն»:
Նա ընդգծել է. «Պետականութեան հիմնասիւն համարւող երեք մարմինների ղեկավարների եւ գերատեսչութիւնների պատասխանատուների ոգեւորութիւնը գնահատելի երեւոյթ է, բայց՝ անբաւարար: Անհրաժեշտ է ճիշտ ժամանակին կայացնել որոշումները եւ հետեւել իրականացման ընթացքին: Այլապէս պաշտօնների ու կոչումների յաջորդական կարգին համապատասխան վարւելակերպով (հիերարխիայի) թուլանում կամ շատ դէպքերում չեն իրականացւում լաւ որոշումները»։
Յեղափոխութեան առաջնորդը էներգիայի բանեցման խնայողութիւնը համարել է կառավարման կարողութիւնների նպատակային գործարկման հիմնարար անհրաժեշտութիւն եւ ընդգծել. «Առաջին հերթին հասարակութիւնն ու պետական կառոյցները, որոնք էներգիայի բոլոր տեսակների ամենամեծ սպառողներն են, պէտք է յարմարւեն խնայողութեանը: Սա հէնց այն որոշումներից է, ինչին պէտք է նշւած հետեւողականութիւնը»:
Այաթ. Խամենէին անդրադառնալով Օմանի բանակցութիւններին, այն համարել է արտգործնախարարութեան տասնեակ խնդիրներից մէկը եւ ընդգծել. «Երկրում առկայ խնդիրները չպէտք է կապել այդ բանակցութիւնների հետ: Իսկ «Բարջամ»-ում թոյլ տրւած սխալը, որով ասւում էր, որ ամէն ինչ կախւած է բանակցութիւնների առաջընթացից, չպէտք է կրկնել, քանի որ իրավիճակը դառնում է պայմանական, եւ ամէն ինչ, այդ թւում՝ ներդրումներն են դադարում, մինչեւ բանակցութիւնների արդիւնքների պարզ դառնալը»:
Ընդգծելով երկրում գործունէութեան շարունակականութեան կարեւորութիւնը բոլոր արդիւնաբերական, տնտեսական, շինարարական, մշակութային ոլորտներում, յեղափոխութեան առաջնորդը դրանք համարել է Օմանի բանակցութիւնների հետ կապ չունեցող իրողութիւն ու ծրագրեր:
«Երկրի որոշումը՝ կապւած խնդիրները բանակցելով լուծելը լաւ քայլ էր: Դրանից յետոյ զգուշաւորութիւնը անհրաժեշտութիւն է, քանի որ կարմիր գծերը մեզ եւ միւս կողմի համար լիովին պարզ են: Բանակցութիւնները կարող են աւարտին հասնել կամ չհասնել: Իհարկէ, միւս կողմի նկատմամբ հոռետես լինելու պատճառ ունենք, բայց մենք լաւատես ենք մեր հնարաւորութիւնների նկատմամբ»:
Յեղափոխութեան առաջնորդը անհրաժեշտ է համարել «Բարգաւաճման 7-րդ ծրագրի» ճշգրիտ ու անշեղ իրականացումը՝ եւ նշել. «Երկրի մակրօքաղաքականութեան վրայ հենւող այս լաւ ծրագիրը պէտք է ի սկզբանէ իրականացւի հետեւողական վերահսկողութեամբ՝ ամուր եւ հաստատուն կամքով»:
