ԱԳ նախարար. «Եթէ ամերիկացիներն անիրագործելի պահանջներ չդնեն, հաւանական է նաեւ համաձայնութիւնը լինի»
«ԱԼԻՔ» – Իրանը միայն անուղղակի բանակցութիւններ է վարելու ԱՄՆ-ի հետ, եւ եթէ ամերիկացիներն անիրագործելի պահանջներ չդնեն, համաձայնութեան հասնելը հաւանական է։ Այս մասին Մոսկւայում ՌԴ ԱԳ նախարար Սերգէյ Լաւրովի հետ մամուլի ասուլիսում ասել է ԱԳ նախարար Սէյէդ Աբբաս Արաղչին,- յայտնում է Mehr գործակալութիւնը:
«Մենք միայն անուղղակի բանակցութիւններ ենք ունենալու: Գործադրւած առաւելագոյն ճնշման պատճառով մենք չենք կարող ուղղակի բանակցութիւնների մէջ մտնել։ Անուղղակի բանակցութիւնները տարօրինակ չեն, եւ կարելի է պայմանաւորւածութիւններ ձեռք բերել։ Առաջին փուլում մենք խօսեցինք միջուկային խնդիրների եւ պատժամիջոցների վերացման մասին»,- ընդգծել է նա:
Օմանում կայացած բանակցութիւնների առաջին փուլում, ըստ Արաղչիի, իրանական կողմը տեսել է, որ ԱՄՆ-ն լուրջ է տրամադրւած:
«Վաղը սպասում ենք ամերիկեան կողմի դիրքորոշումները լսելուն. եթէ նրանք չունենան անտրամաբանական, անիրատեսական եւ անիրագործելի խնդրանքներ, հնարաւոր է համաձայնութեան հասնել»,- ընդգծել է նա:
