Մայր աթոռ. «Դատապարտելի են հայկական բնակավայրերը, սրբավայրերը «ադրբեջանական» կամ «ալբանական» ներկայացնելու փորձերը»
«ԱԼԻՔ» – «2025 թւականի ապրիլի 8-ին Վարշաւա քաղաքում Լեհաստանում Ադրբեջանի դեսպանութեան կողմից կազմակերպւած «Արեւմտեան Ադրբեջան՝ մեր մշակութային յիշողութեան մէջ» խորագրով ցուցահանդէսը հերթական դրսեւորումն է Ադրբեջանի կողմից իրականացւող կեղծ քարոզչութեան, որն արտայայտութիւնն է Հայաստանի Հանրապետութեան նկատմամբ վերջինիս տարածքային նկրտումների եւ հայ ժողովրդի բազմադարեայ հոգեւոր եւ մշակութային ժառանգութեան իւրացման ձգտումների»։ Այս մասին ասւած է Մայր Աթոռի Ս. Էջմիածնի տեղեկատւական համակարգի տարածած հաղորդագրութեան մէջ:
«Խստագոյնս դատապարտելի են Ադրբեջանի կողմից պատմութիւնը վերաշարադրելու գործողութիւնները, Հայաստանի եւ Արցախի տարածքում գտնւող հայկական բնակավայրերը, սրբավայրերն ու պատմամշակութային արժէքները «ադրբեջանական» կամ «ալբանական» ներկայացնելու փորձերը։
Նման մերժելի նախաձեռնութիւնները ոչ միայն չեն նպաստում տարածաշրջանում խաղաղութեան հաստատմանը, այլեւ չէզոքացնում են ժողովուրդների համերաշխութեան եւ խաղաղ գոյակցութեան միջավայրի ձեւաւորման բոլոր քայլերը։ Մշակոյթը պէտք է լինի կամուրջ ժողովուրդների միջեւ, ոչ թէ քաղաքական շահախնդրութեան գործիք։
Կոչ ենք անում միջազգային հանրութեանն ու կազմակերպութիւններին, դիւանագիտական շրջանակներին եւ մշակութային կառոյցներին յստակ գնահատական տալ պատմութեան ու մշակոյթի նկատմամբ կատարւող այսպիսի կեղծարարութիւններին եւ խստօրէն դատապարտել Ադրբեջանի կողմից հայ ժողովրդի հանդէպ իրականացւող նմանօրինակ ոտնձգութիւնները»,- ասւած է տարածւած հաղորդագրութեան մէջ:
