Հնդկաստանի վարչապետը Քաշմիրում յարձակմանն արձագանգելու համար երկրի ԶՈՒ-ին «օպերատիւ ազատութիւն» է տւել

«ԱԼԻՔ» – Հնդկաստանի վարչապետ Նարենդրա Մոդին երկրի զինւած ուժերին «օպերատիւ ազատութիւն» է ընձեռել՝ անցեալ շաբաթ Քաշմիրում տեղի ունեցած մահացու յարձակմանը արձագանգելու համար: Հաղորդում է Agence France-Presse-ը՝ վկայակոչելով կառավարութեան բարձրաստիճան աղբիւրին, երբ Նիւ Դելին մեղադրել է իր գլխաւոր մրցակից Պակիստանին։

Երեքշաբթի փակ դռների յետեւում անցկացւած հանդիպման ժամանակ Մոդին բանակի եւ անվտանգութեան ղեկավարներին յայտարարել է, որ զինւած ուժերը «լիակատար օպերատիւ ազատութիւն ունեն Քաշմիրում քաղաքացիական անձանց դէմ ահաբեկչական յարձակմանը Դելիի արձագանգի եղանակը, նպատակը եւ ժամկէտները որոշելու համար, նշել է աղբիւրը:

Մոդին յայտարարել է նաեւ, որ Հնդկաստանը լի է ահաբեկչութեանը ջախջախիչ հարւած հասցնելու ազգային վճռականութեամբ։

Աղբիւրը յաւելել է, որ Մոդին «արտայայտել է իր լիակատար վստահութիւնը Հնդկաստանի զինւած ուժերի մասնագիտական ​​կարողութիւնների նկատմամբ» եւ վստահեցրել նրանց իր կառավարութեան լիակատար աջակցութեան մասին։

Երկու հարեւան երկրների միջեւ յարաբերութիւնները կտրուկ վատթարացել են ապրիլի 22-ին Հնդկաստանի կողմից վերահսկւող Քաշմիրի խաղաղ բնակիչների վրայ պակիստանցի զինեալների յարձակումից յետոյ, որի հետեւանքով զոհւել է 26 մարդ։ Իսլամաբադը հերքել է մեղադրանքը, եւ այդ ժամանակւանից ի վեր երկու երկրների միջեւ  Քաշմիրում փոխհրաձգութիւն է եղել, ​​​​ փոխադարձ դիւանագիտական խայթոցներ հղել, արտաքսել քաղաքացիների եւ հրամայել են փակել սահմանները։