ՀՀԿ. «Խստօրէն դատապարտում ենք Հայաստանի կառավարչի եւ նրան կողակցւած անձի զարհուրելի վարքագիծը»
«ԱԼԻՔ» – ՀՀԿ Գործադիր մարմինը յայտարարութիւն է տարածել՝ խստօրէն դատապարտելով Հայ Առաքելական Եկեղեցու դէմ Նիկոլ Փաշինեանի եւ նրա կնոջ անբարոյ յայտարարութիւնները:
«Սիրելի՛ հայրենակիցներ,
Այսօր մենք հերթական անգամ ականատեսն ենք իշխող վարչախմբի կողմից մեր ազգային ինքնութեան հիմնական ինստիտուտների դէմ այլանդակ եւ անընդունելի նոր գործողութիւնների, որոնք վերջին օրերին արտայայտւում են յատկապէս Հայաստանեայց Առաքելական Սուրբ եկեղեցու դէմ այլեւս անթաքոյց, առաւել թունոտ ու զազրելի յարձակումներով:
Այս գործողութիւնները ոչ միայն ոտնահարում են մեր արժանապատւութիւնը, այլեւ արտացոլում են ռեժիմի բռնապետական բնոյթը՝ կանխամտածւած շարունակական հարւած հասցնելով պետականութեան հիմքերին եւ ժողովրդավարութեանն ու մարդու հիմնարար ազատութիւններին։
ՀՀ Սահմանադրութիւնը յստակօրէն սահմանում է եկեղեցու եւ պետութեան տարանջատումը՝ ապահովելով, որ կառավարութիւնը որեւէ իշխանութիւն չունենայ սահմանադրօրէն բացառիկ առաքելութիւն ունեցող ազգային եկեղեցու նկատմամբ:
Այս սկզբունքը հիմնարար է Հայաստանեայց Առաքելական Սուրբ եկեղեցու ինքնավարութեան պահպանման համար:
Որպէս քրիստոնէութիւնը առաջինը պետական կրօն ընդունած ազգի կառոյց, Հայաստանեայց Առաքելական Սուրբ եկեղեցին դարեր շարունակ եղել եւ մնում է մեր ինքնութեան անբաժանելի մասը, մեր ազգային գիտակցութեան հենասիւնը՝ ծառայելով որպէս յոյսի, դիմադրողականութեան եւ միասնութեան փարոս: Եւ այս պարագայում տւեալ հարցը պարզապէս սահմանադրականութեան խնդիր չէ, այն ստոր հարւած է մեր ազգային միասնութեանը, արժանապատւութեանը եւ ազգի ինքնապահպանման հեռանկարին:
Մենք խստօրէն դատապարտում եւ մերժում ենք Հայաստանի կառավարչի եւ նրան կողակցւած անձի զարհուրելի վարքագիծը, քանի որ այն սպառնում է քայքայել մեր հասարակական համախմբւածութեան հիմքը եւ վտանգի տակ է դնում մեր ժողովրդի ու նրա սուրբ հաւատքի միջեւ կապը:
Մեր պարտականութիւնն է՝ պաշտպանել այս հաստատութիւնը անհիմն միջամտութիւնից եւ ամուր կանգնել մեր ազգային արժէքների բացառիկ պահապանի կողքին:
Աւելին, կարեւոր է ընդգծել մեր եկեղեցու նկատմամբ դրածոյ ռեժիմի կողմից գարշելի յարձակումների եւ մեր հոգեւոր ու մշակութային ժառանգութեան նկատմամբ ադրբեջանական ոտնձգութիւնների միջեւ ակնյայտ զուգահեռը։ Ադրբեջանը հետեւողականօրէն ձգտել է ոչնչացնել մեր կապը մեր ինքնութեան հետ՝ համակարգւած կերպով ջնջելով կամ նենգափոխելով հայկական եկեղեցիների, յուշարձանների եւ աւանդոյթների նշանակութիւնը, ինչն այժմ տեղի է ունենում նաեւ բռնազաւթւած Արցախում։ Ներկայիս խայտառակ իրողութիւնը կրկին օրհասական է դարձնում համաժողովրդական պահանջով նոր կառավարութեան ձեւաւորման հրամայականը։
Ժամանակն է բռունցքւելու, վճռականութեան եւ գործողութիւնների, որպէսզի ձեւաւորւի այնպիսի կառավարութիւն, որը առաջնահերթութիւն կը տայ մեր երկրի եւ ժողովրդի բարեկեցութեանն ու ազգային արժէքների պաշտպանութեանը։
Մենք կոչ ենք անում բոլոր հայերին՝ թէ՛ Հայրենիքում, թէ՛ Սփիւռքում, միաւորւել ու այս աւտորիտար նողկալի գործողութիւնները մերժելու գործում եւ հաստատելու մեր նւիրւածութիւնը մեր եկեղեցուն եւ նրա դաւանած արժէքներին։ Միասի´ն բեկենք անհանդուրժելի իրականութիւնը, պաշտպանե´նք մեր ինքնութիւնը: Հաւատով յոյսով եւ միասնութեամբ՝ յանուն հոգու եւ Հայրենիքի փրկութեան»,- ասւած էՀՀԿ ԳՄ տարածած յայտարարութեան մէջ:
