Դիւանագէտների համահայկական խորհուրդ. «Բանսարկու եւ ազգադաւ խմբակի որդեգրած քաղաքականութիւնը հերթական անգամ համընկնում է մեր ոխերիմ թշնամիների խօսոյթին»
«ԱԼԻՔ» – Դիւանագէտների համահայկական խորհուրդը յայտարարութիւն է տարածել, որտեղ խստօրէն դատապարտում է Հայ Առաքելական Եկեղեցու հասցէին Հայաստանում իշխող վարչախմբի ու նրա պարագլխի՝ յատկապէս վերջին օրերին տարրական բարեկրթութեան եւ բարոյականութեան բոլոր սահմանները հատած արտայայտութիւնները:
Յայտարարութեան մէջ ասւած է.
«Հանրային տիրոյթում անթոյլատրելի եւ բարձրագոյն պաշտօնների հետ բացարձակապէս անհամատեղելի այդ արտայայտութիւնները համարում ենք ոչ միայն կրթութեան, գիտելիքների, բարոյականութեան ու դաստիարակութեան ակնյայտ բացակայութեան հիւանդագին դրսեւորումներ, այլեւ միտումնաւոր եւ մտածւած քաղաքականութիւն, որի թիրախն են.
– Դարերի ընթացքում ձեւաւորւած մեր ինքնութեան հենասիւներն ու արժէքային համակարգը,
– ՀՀ Սահմանադրութիւնը, որով Եկեղեցին անջատ է պետութիւնից, իսկ Հայ Առաքելական եկեղեցին ունի բացառիկ դեր,
– Իշխանութիւնների զրոյական արժեւորման համեմատ՝ Հայ Առաքելական Եկեղեցու է՛լ աւելի աճող հեղինակութիւնը,
– Իշխանութիւնների աջակցութիւնից զրկւած եւ նրանց կողմից մոռացւած Արցախի մեր եղբայրների ու քոյրերի իրաւունքների, հետեւաբար մեր բոլորի իրաւունքների պաշտպանութեան հարցում Եկեղեցու հետեւողական ջանքերն ու անթաքոյց նախանձախնդրութիւնը:
Արցախը կորցրած, պատերազմը տանուլ տւած, հազարաւոր կեանքեր զոհած, մեր ինքնիշխան երկրի տարածքները ոսոխին նւիրող, իր իսկ նախընտրական ծրագրերը եւ պետութեան ներքին ու արտաքին քաղաքականութիւնը տապալած, մեր ինքնութեան հիմքերը եւ պետական ինստիտուտները թիրախաւորած, երկիրը աննախադէպ ճգնաժամի հասցրած, բանսարկու եւ ազգադաւ խմբակի որդեգրած քաղաքականութիւնը հերթական անգամ համընկնում է մեր ոխերիմ թշնամիների խօսոյթին եւ ուղղւած է մեր ժողովրդի առջեւ ծառացած խնդիրներից ու գոյութենաբանական մարտահրաւէրներից մեզ բոլորիս շեղելուն, հասարակութիւնը հերթական անգամ պառակտելու ստոր քաղաքականութեամբ իրենց երերացող աթոռը պահպանելուն:
Ատելութեան, չարութեան եւ նախանձի հիմքով իշխանութեան եկած ու հասարակութեան տարբեր շերտերին տարիներ շարունակ իրար դէմ լարելուն լծւած եւ հոգեւարքի մէջ գտնւող իշխանութեան խօսոյթն ու գործողութիւնները սպառնալիք են ոչ միայն մեր հոգեւոր դասի եւ Եկեղեցու համար, այլեւ ողջ հայութեան համար, որովհետեւ Եկեղեցին հէնց ժողովուրդն է, եւ Հայաստանեայց Առաքելական Եկեղեցին՝ ողջ աշխարհասփիւռ հայ ժողովուրդը՝ ազգընտիր Հայրապետի գլխաւորութեամբ:
Մեր ժողովրդի գիտակից եւ Հայաստանեայց Առաքելական Սուրբ Եկեղեցու բարեպաշտ բոլոր զաւակների հետ միասին մենք կանգնած ենք Հայոց եկեղեցու կողքին եւ յայտնում ենք նրան մեր լիակատար աջակցութիւնը»։
