«ԱԼԻՔ» – Արա Շահվերդեանը եւ Գեղարդ Մանսուրեանը համատեղ ուղերձով դատապարտել են սիոնիստական ռեժիմի իրականացրած աւիայարձակումներն Իրանի ժողովրդի եւ ԶՈՒ-ի հրամկազմի դէմ:
Ուղերձում մասնաւորապէս նշւած է. «Կրկին բացայայտւեց բռնազաւթիչ Իսրայէլի դաժան եւ յանցաւոր դէմքը, որը վախկոտի պէս անցել է ԶՈՒ-ի հրամկազմի, միջուկային գիտնականների եւ խաղաղ բնակչութեան սպանդի:
Իսլ. Հանրապետութեան պատասխանն, անշուշտ, կը լինի ջախջախիչ եւ խորիմաստ, նրանց մատնելով պարտութեան, յուսահատութեան եւ ափսոսանքի գիրկը»։
Աւելի ուշ, պարլամենտում կրօնական փոքրամասնութիւնների բոլոր 5 պատգամաւորները համատեղ յայտարարութեամբ հանդէս գալով դատապարտել են սիոնիստական ռեժիմի կողմից Իրանի ժողովրդի դէմ իրականացւող պատերազմական յանցագործութիւնները:
Յայտարարութեան մէջ մասնաւորապէս նշւած է. «Մենք՝ Իրանի Իսլամական խորհրդարանում կրօնական փոքրամասնութիւնների պատգամաւորներս, դատապարտելով այս դաժան, ահարկու եւ անմարդկային յարձակումները, զոհւած քաջարի հրամանատարներին, միջուկային գիտնականներին եւ խաղաղ քաղաքացիներին, ովքեր զոհաբերեցին իրենց կեանքը եւ արժանացան նահատակութեան փառքին. նրանց հոգիներին հանգստութիւն մաղթելով, մեր ցաւակցութիւնն ենք յայտնում, եւ լիայոյս ենք, որ Իրանի խոհեմ ժողովուրդը պահպանելով ազգային համախմբւածութիւնն ու միասնութիւնը, միասնական ոգով, կարեկցելով մէկը միւսին, եւ, յատկապէս, ուղղորդւելով Գերագոյն առաջնորդ Այաթ. Խամենէիի ցուցումներով մէկընդմիշտ վերջ կը դնի՝ բռնազաւթիչ սիոնիստական ռեժիմի բռնապետութեանը»:
Յայտարարութեան մէջ Իսլամական խորհրդարնում կրօնական փոքրամասնութիւնների պատգամաւորներն ընդգծել են, որ միայն ուժի լեզուն է, որ կարող է հասկանալի պատասխան լինել նման ռեժիմի համար: Պատգամաւորները նաեւ նշել են, որ Իրանի Իսլամական Հանրապետութեան պատասխան հարւածը չի ուշանայ, եւ անկասկած լինելու է դիպուկ եւ ամենախոհեմ տեսքով:
