Բաղային անընդունելի է համարել ԻՀԿ յայտարարութեան մէջ Հայաստանին առնչւող ձեւակերպումները
«ԱԼԻՔ» – Պաշտօնական Թեհրանը թարմացրել է Հայաստանի հետ կապւած Իսլամական համագործակցութեան կազմակերպութեան (ԻՀԿ) ամփոփիչ հռչակագրի վերաբերեալ իր դիրքորոշումը:
ԱԳՆ պաշտօնական ներկայացուցիչ Էսմայիլ Բաղային անդրադառնալով թեմային՝ նշել է, որ փաստաթղթում օգտագործւած որոշ արտայայտութիւններ անընդունելի են Իրանի համար:
«Իսլամական համագործակցութեան կազմակերպութեան կողմից որոշ հասկացութիւնների, բառերի եւ արտայայտութիւնների օգտագործումը մեզ համար անընդունելի է։ Մենք համոզւած ենք, որ նման ձեւակերպումները, որոնք կարող են ակնարկել աշխարհաքաղաքական փոփոխութիւնների ձգտում, բացարձակապէս կառուցողական չեն եւ չպէտք է դառնան տարածաշրջանի երկրների գործնական քաղաքականութեան հիմքը»,- յստակեցրել է Բաղային։
Այսպիսով, պաշտօնական Թեհրանը հասկացրել է, որ չի աջակցում դրոյթներին, որոնք կարող են մեկնաբանւել որպէս ճնշում տարածաշրջանի երկրների, այդ թւում՝ Հայաստանի, ինքնիշխանութեան կամ տարածքային ամբողջականութեան վրայ։
