«ԱԼԻՔ» – Սիոնիստական ռեժիմի սանձազերծած 12-օրեայ պատերազմը դատապարտելու նպատակով, երէկ՝ յուլիսի 9-ին, Թեհրանում Իսլամական մշակոյթի եւ մտքի հետազօտական ինստիտուտի, եւ Իսլամական մշակոյթի եւ առաջնորդութեան նախարարութեան կրօնական փոքրամասնութիւնների գերատեսչութեան նախաձեռնութեամբ կազմակերպւել էր խորհրդաժողով՝ ներկայութեամբ Իրանի Իսլամական խորհրդարնում կրօնական ու էթնիկ փոքրամասնութիւնների պատգամաւորների եւ հոգեւոր առաջնորդների:
Խորհրդաժողովը, կազմակերպւել էր մասնագիտական երկու բաժիններում, որի առաջին բաժնում ելոյթով հանդէս եկաւ Թեհրանի հայոց թեմի առաջնորդ Տ. Սեպուհ արք. Սարգսեանի օգնական Տ. Առաքել աբղ. Գատեհճեանը:
Իր ելոյթի ընթացքում Հայր Սուրբը ընդգծեց. «Սիոնիստական վարչակազմը, ինչպէս ծանօթ է բոլորիս, իր հիմնադրութեան առաջին օրերից սկսեալ մինչեւ այսօր, տարածաշրջանի երկրների եւ ժողովուրդների համար վտանգի եւ վնասի աղբիւր է դարձել: Նա իր վարքով անտեսել եւ ոտնահարել է միջազգային, բարոյական, կրօնական եւ մարդկային բոլոր օրէնքները, իրաւունքները եւ արժէքները: Երբ նայենք վերջին օրերին նրա պարտադրած 12-օրեայ պատերազմին, այնտեղ պիտի գտնենք երեք հիմնական կէտեր, որոնք հակասում են կրօնական եւ բարոյական արժէքներին: …Ազատութեան ոտնձգում, Խաղաղութեան խախտում եւ Պատերազմի պարտադրում»: Հայր Սուրբն ապա իւրաքանչիւր գլխի տակ համապարփակ բացատրութիւններ ներկայացրեց:
Խորհրդաժողովի երկրորդ բաժնում ելոյթով հանդէս եկաւ Իրանի Իսլամական խորհրդարնում Թեհրանի եւ հիւսիսային իրանահայութեան պատգամաւոր Արա Շահվերդեանը:Իր ելոյթի ընթացքում պատգամաւորը անդրադառնալով սիոնիստական ռեժիմի պարտադրեալ պատերազմին ընդգծեց. «Ագրեսոր ռեժիմը հերթական անգամ իր վայրագութեամբ ու նենգութեամբ ի ցոյց դրեց իր իրական դէմքը՝ անարդար յարձակումներով թիրախ դարձնելով մեր ռազմական, քաղաքացիական եւ գիտական ենթակառուցւածքները։ Այս պատերազմում տեղի ունեցածը լոկ ռազմական առճակատում չէր, այլ՝ Իրանի ժողովրդի ազգային կամքի, սոցիալական համախմբւածութեան եւ պաշտպանական հզօրութեան դրսեւորումն էր»:Նա ընդգծեց. «Այս 12-օրեայ պատերազմում Իրանը միայնակ չէր. Իրանի ժողովուրդը, Իրանի էթնիկ ու կրօնական համայնքները, բոլորը միասնաբար ոտքի կանգնեցին, ասելու, որ ոչ մի ուժ ընդունակ չէ վտանգել այս երկիրը, եւ ոչ մի սպառնալիք չի կարող անջրպետ ստեղծել մեր միասնութեան մէջ: Ես որպէս Թեհրանի եւ հիւսիսային իրանահայութեան պատգամաւոր հպարտութեամբ ընդգծում եմ, որ ինչպէս միշտ իրանահայութիւնը կանգնած է եւ կանգնելու է Իրանի եւ Իրանի ժողովրդի կողքին»:
Կամզմակերպւած խորհրդաժողովին ներկայ էին՝ Իրանի Հայ կաթողիկէ համայնքի առաջնորդ Տ. Սարգիս եպս. Դաւիթեանը, Թ. Հ. Թ. Թեմական խորհրդի ատենապետ Վարուժ Յովհաննիսեանը, Կաթողիկէ համայնքի Թեմական խորհրդի ներկայացուցիչը, ազգային առաջնորդարանի դիւանապետ Զօրիկ Կարապետեանը եւ Տ. Գրիգորիս քհնյ. Ներսիսեանը:
Ելոյթներով հանդէս եկան Հանրապետութեան նախագահի խորհրդական եւ կրօնական փոքրամասնութիւնների հարցով պատասխանատու հոջ. Ալաւին, կրօնական եւ էթնիկ փոքրամասնութիւնների պատգամաւորները եւ հոգեւոր առաջնորդները:
