Արթուր Խաչատրեան. «Իշխանութեան քաղաքական տեռորի ալիքը բարձրացաւ Էրդողանի ու Ալիեւի հետ հանդիպումների արանքում»
«ԱԼԻՔ» – ՀՅԴ անդամ, ՀՀ ԱԺ «Հայաստան» խմբակցութեան պատգամաւոր Արթուր Խաչատրեանը ֆէյսբուքեան իր էջում գրառում է կատարել՝ անդրադառնալով վերջին օրերի ընթացքում ՀՀ գործող իշխանութիւնների սանձազերծած քաղաքական տեռորի ալիքին՝ յիշեցնելով, որ այն բարձրարցել է Փաշինեանի՝ Էրդողանի եւ Ալիեւի հետ հանդիպումների արանքում
«Էրդողանից մինչեւ Ալիեւ. կոնկրետ արդիւնքներ։
Յունիսի 20-ին, Փաշինեանն աշխատանքային այցով մեկնեց Ստամբուլ: Ինչ քննարկեցին էրդողանն ու Փաշինեանը Թուրքիայում՝ յայտնի չէ։ Հանդիպման մասին տարածած տեղեկատւութիւնն աւելի շատ հարցեր առաջացրեց, քան պատասխաններ տւեց։ «Կողմերը քննարկել են Հայաստան-Թուրքիա յարաբերութիւնների կարգաւորման ընթացքը, ընդգծել կառուցողական երկխօսութեան շարունակականութեան եւ կոնկրետ արդիւնքների հասնելու կարեւորութիւնը»։ Կարգաւորման ընթացք չկայ, կառուցողական երկխօսութիւն՝ առաւել եւս։
Բայց ահա «կոնկրետ արդիւնքներն» ակներեւ են։ Թուրքիայից վերադառնալուց յետոյ իշխանութիւնները «բացայայտեցին» սարսափազդու եւ մահազդու մի դաւադրութիւն, որը պէտք է իրականացւէր մանկական ճայթուկներով՝ ժամկէտանց ծրագրի համաձայն։ Արդիւնքում՝ քրէական գործեր յարուցւեցին «Սրբազան շարժման» անդամների եւ անձամբ Բագրատ Սրբազանի դէմ։ Կալանաւորւեցին շարժման շուրջ երկու տասնեակ անդամներ ներառեալ Բագրատ Սրբազանը եւ ՀՀ ԱԺ «Հայաստան» խմբակցութեան պատգամաւոր Արթուր Սարգսեանը։
«Սրբազան շարժման» դէմ ծաւալած գրոհին եւ Բագրատ Սրբազանի կալանաւորմանը յաջորդում է Նիկոլի ուժայինների ամօթալի յարձակումը Մայր Աթոռի վրայ (այլ կերպ այդ գործողութիւնը բնորոշել հնարաւոր չէ)։ Նման բան, մինչ այժմ, իրենց թոյլ էին տւել բացառապէս օտարազգի զաւթիչները։ Յեղաշրջման/իշխանազաւթման մեղադրանքով կալանաւորւում է հականիկոլական հայեացքներով յայտնի եւս մէկ բարձրաստիճան հոգեւորական՝ Միքայէլ Սրբազանը։ Սաստկանում է Հայաստանեայց Առաքելական սուրբ եկեղեցու դէմ վայրահաչը՝ թիրախաւորելով անմիջապէս Վեհափառ Հայրապետին։
Զաւեշտալի մեղադրանքով կալանաւորւում է Կարէն Կարապետեանը։ ՔՊ-ն մօտ ապագայում աւարտին կը հասցնի ՀԷՑ-ը խլելու գործընթացը։ Չի բացառւում, որ միայն ՀԷՑ-ով չսահմանափակւեն։ Ու հէնց այդ օրերին, լրիւ պատահաբար, Հայաստանն ու Թուրքիան քննարկում են էներգետիկ բնագաւառում համագործակցութեան կարեւորութիւնը։ Ինչո՞վ պակաս կոնկրետ արդիւնք է։
Եւ վերջապէս գրոհը ՀՀ ԱԺ «Հայաստան» խմբակցութեան դէմ։ Բացի Արթուր Սարգսեանի դէմ զաւեշտալի քրէական գործ յարուցելուց ու կալանաւորելուց, ոչ պակաս զաւեշտալի քրէական գործեր են յարուցւում խմբակցութեան ղեկավար Սէյրան Օհանեանի ու խմբակցութեան քարտուղար Արծւիկ Մինասեանի դէմ։ Ակնյայտ է, որ Փաշինեանը փորձում է գլխատել ամենամեծ եւ արմատական ընդդիմադիր խմբակցութիւնը։ Նիկոլականները սպառնում են շարունակել քրէական հետապնդումների շարքը։
Ահա այսպիսի արդիւնքներով է Նիկոլը վաղը հանդիպելու իր կիրթ եւ կառուցողական գործընկեր իլհամի հետ։ Զեկոյց կը ներկայացւի կատարած աշխատանքների ու ձեռքբերւած արդիւնքների մասին, պարզաբանումներ կը ներկայացւեն որոշ ուշացումների վերաբերեալ (օրինակ՝ ինչու է Վեհափառը դեռեւս վեհարանում), նոր բարձրունքներ նւաճելու յանձնարարականներ կը տրւեն։ Այնպէս որ, սպասէք այս տրագիկոմիկ սերիալի շարունակութեանը։ Վերջիվերջոյ, Ալիեւին ու Էրդողանին անհրաժեշտ է Հայաստանը զրկել ինքնիշխանութիւնից ու ինքնուրոյնութիւնից, դարձնել խամաճիկային, կառավարելի պետութիւն։ Դէ իսկ Նիկոլը պատրաստ է լինել դրանց նշանակած կուսակալը, միայն թէ պահպանի իր աթոռը։
Ուստի, ամենեւին էլ պատահական չէր, որ Հայաստանում իշխանութիւնների կողմից սանձազերծած քաղաքական տեռորի այս ալիքը բարձրացաւ Էրդողանի ու Ալիեւի հետ հանդիպումների արանքում….»,- գրել է նա:
