«ԱԼԻՔ» – Իրանի միջուկային ծրագիրը ԱՄՆ-ի համար ընդամէնը պատրւակ է Իրանի հետ առճակատումը շարունակելու համար։ Այս մասին, երէկ՝ յուլիսի 29-ին, 12-օրեայ պատերազմի նահատակների 40-օրեակի առիթով կազմակերպւած միջոցառման ժամանակ յայտարարել է Իսլ. յեղափոխութեան առաջնորդ այաթ. Սէյէդ Ալի Խամենէին:
Իր ելոյթում, Իսլ. յեղափոխութեան առաջնորդը 12-օրեայ պատերազմն անւանել է Իսլամական Հանրապետութեան կամքի եւ ուժի դրսեւորման ապացոյցը եւ նրա հիմքերի անխախտ ամրութեան ցուցիչը: Ընդգծելով, որ մեր երկրի նկատմամբ թշնամանքի հիմնական պատճառը չարմաիտ ուժերի հակադրութիւնն է իրանական ժողովրդի հաւատքին, գիտական ներուժին եւ միասնականութեանը՝ այաթ. Խամենէին վստահեցրել է, որ Աստծոյ կամօք եւ օգնութեամբ, Իրանի ժողովուրդը երբեւէ չի հրաժարւի հաւատքի ամրապնդման եւ գիտական կարողականութեան ընդլյանման ուղուց, եւ ի հեճուկս չարակամներին հայրենիքը կը բարձրացնի առաջընթացի եւ զարգացման գագաթնակէտին:
«Այս 12 օրւայ ընթացքում գրանցւած նւաճումներից բացի, որոնց մասին խոստովանում է ողջ աշխարհը, Իրանի ժողովրդին յաջողւեց աշխարհին ցոյց տալ իր ուժը, տոկունութիւնը, վճռականութիւնը եւ կամքը, որպէսզի բոլորն անմիջականօրէն զգան Իսլամական Հանրապետութեան ուժը»,- նշել է այաթ. Խամենէին:
Նշելով, որ Իսլամական Հանրապետութիւնը կրօնահենք եւ գիտահենք համակարգ է, իսլ. յեղափոխութեան առաջնորդը հէնց սա էլ համարել է Իրանի նկատմամբ ԱՄՆ-ի եւ մեծապետական այլ ուժերի թշնամանքի պատճառը:
«Այն, ինչ նրանք անւանում են միջուկային խնդիր, ուրանի հարստացում, մարդու իրաւունքներ եւ այլն, ընդամէնը պատրւակ է։ Ըստ էութեան, նրանց դժգոհութեան եւ մտահոգութեան հիմնական պատճառը նոր դիսկուսը, ինչպէս նաեւ Ճշգրիտ եւ հումանիտար գիտութիւնների, տեխնոլոգիայի եւ կրօնի ասպարէզներում Իսլամական Հանրապետութեան կարողականութիւններն են: Նրանք համաձայն չեն մեր հաւատքի եւ ուսմունքի հետ»,- յստակեցրել է այաթ.Խամենէին՝ նշելով, որ Իրանի ժողովուրդն ու երիտասարդութիւնը համախմբւելով կրօնի եւ գիտութեան առանցքների շուրջ, թշնամուն ստիպել են նահանջել, եւ այսուհետ եւս նոյն կերպ են գործելու:
