Էբրահիմ Ռեզայի. «Սիւնիքի հնարաւոր կորուստն ուղղակի սպառնալիք է Իրանի շահերին»
«ԱԼԻՔ» – Սիւնիքի հնարաւոր կորուստն ուղղակի սպառնալիք է Իրանի Իսլամական Հանրապետութեան շահերին: Այս մասին SNN հեռուստաալիքին տւած հարցազրոյցում յայտարարել է Իսլ. խորհրդարանի պատգամաւոր, խորհրդարանի ազգային անվտանգութեան եւ արտաքին քաղաքականութեան յանձնաժողովի անդամ Էբրահիմ Ռեզային՝ մեկնաբանելով այսպէս կոչւած «Զանգեզուրի միջանցք»-ի շուրջ զարգացումները:
Նշելով, որ այս կապակցութեամբ Իրանի Իսլամական Հանրապետութեան դիրքորոշումը յստակ է եւ անփոփոխ՝ պատգամաւորը վստահեցրել է, որ Իրանը որեւէ պարագայում թոյլ չի տայ տարածաշրջանում իրավիճակի փոփոխութիւն:
«Հայաստանը Իրանի ռազմավարական գործընկերն է։ Իրանը միշտ ունեցել է լաւագոյն յարաբերութիւններ Հայաստանի հետ՝ անկախ այնտեղ եղած իշխանութիւններից։ Հայաստանն Իրանը Եւրոպային կապող դարպասն է: Եթէ այն, ինչ որոշ շրջանակներում շրջանառւում է որպէս «Զանգեզուրի միջանցք», իրագործւի, ապա մենք կը կորցնենք մի հարեւան, եւ տարածաշրջանի աշխարհաքաղաքականութիւնը կը փոխւի, ինչը հակասում է մեր ազգային շահերին: Մենք չենք հանդուրժի մեր շահերին սպառնացող որեւէ բան։ Անկախ պայմաններից՝ կը պաշտպանենք մեր շահերը»,- ասել է պատգամաւորը՝ յաւելելով.
«Այս պահին Հայաստանում իշխող կառավարութիւնը որոշ թուլութիւններ ունի, եւ մենք արդէն տեսել ենք, որ նրանք բաւարար կարողութիւն չունեն այդ տարածքը պաշտպանելու համար։ Հայաստանի դիրքորոշումն ու մեր դիրքորոշումը մինչ օրս նոյնն է եւ որեւէ փոփոխութիւն չի եղել։ Շատ երկրներ, նոյնիսկ եւրոպական որոշ երկրներ, ինչպիսիք են Ֆրանսիան, որոնց հետ մենք այլ ոլորտներում հակասութիւններ ունենք, այս հարցում մեզ հետ նոյն դիրքորոշումն ունեն։ Սակայն կայ որոշակի բարդութիւն՝ Ադրբեջանին աջակցող գաղտնի հովանաւորներ կան։ Մենք սկզբունքօրէն կարծում ենք, որ այս տարածաշրջանի եւ Կովկասի խնդիրները պէտք է լուծեն հէնց տեղացիներն ու տարածաշրջանի երկրները։ Այլ ուժերի միջամտութիւնը վերջին տարիներին միայն ճգնաժամեր եւ խնդիրներ է առաջացրել ու խոչընդոտել է դրանց լուծմանը։ Եթէ խնդիրը վստահեն հէնց Կովկասի երկրների ձեռքը, իմ կարծիքով՝ այն լուծելի է, եթէ ուրիշները չխթանեն եւ զէնք չմատակարարեն որոշ երկրներին, եւ միջամտութիւն չլինի»:
