ԱՄՆ պաշտօնեայի այցը Թբիլիսի. Վաշինգտոնի փորձը՝ մեծացնելու ազդեցութիւնը Կովկասում
ԱՄՆ-ի եւ Վրաստանի միջեւ սրւող տարաձայնութիւնների ֆոնին, ԱՄՆ պետքարտուղարի տեղակալի օգնականի այցը Թբիլիսի կրկին բացայայտեց Վաշինգտոնի փորձը՝ մեծացնելու քաղաքական եւ անվտանգութեան ազդեցութիւնը Հարաւային Կովկասի տարածաշրջանում։
Tasnim-ի փոխանցմամբ՝ Սոնատա Քալթերը Վրաստան կատարած իր այցի ընթացքում հանդիպել է կառավարութեան պաշտօնեաների եւ ընդդիմութեան առաջնորդների հետ. գործողութիւն, որը դիտորդները գնահատում են որպէս Թբիլիսիի կառավարութեան վրայ ճնշում գործադրելու ԱՄՆ միջամտողական քաղաքականութեան մաս։ Նախքան այդ, նա այցելել էր Հայաստան, ինչը վկայում է Կովկասում 2026 թւականին տեղի ունեցող զարգացումների նկատմամբ Վաշինգտոնի ուշադրութեան մասին։
ԱՄՆ պաշտօնեայի հետ հանդիպման ժամանակ Վրաստանի կառավարութիւնը ցանկութիւն է յայտնել վերականգնել յարաբերութիւնները Վաշինգտոնի հետ եւ ընդգծել Վրաստանի տարանցիկ դերի կարեւորութիւնը տարածաշրջանային միջանցքներում։
Tasnim լրատւական գործակալութեան փոխանցմամբ՝ միեւնոյն ժամանակ, ԱՄՆ ներկայացուցչի հետ հանդիպման ժամանակ որոշ ընդդիմադիր խմբեր նոյնպէս կոչ են արել Վաշինգտոնին աւելի լայն դեր խաղալ Վրաստանի ներքին զարգացումներում։ Սա եւս մէկ անգամ ամրապնդել է ԱՄՆ-ի կողմից տարածաշրջանի երկրների ներքին գործերին միջամտելու մեղադրանքները։
Միեւնոյն ժամանակ, Թբիլիսիում ՆԱՏՕ-ի ներկայացուցչի միաժամանակեայ ներկայութիւնը եւ պաշտպանական համագործակցութեան ամրապնդման շուրջ բանակցութիւնները մեծացրել են Արեւմուտքի կողմից Կովկասում ռազմական ազդեցութիւնն ընդլայնելու ջանքերի վերաբերեալ մտահոգութիւնները։
Վերջին երկու տարիների ընթացքում ԱՄՆ-Վրաստան յարաբերութիւնները լարւած են եղել «Օտարերկրեայ գործակալների մասին» օրէնքի ընդունումից եւ Վրաստանի ԵՄ անդամակցութեան գործընթացի շուրջ վէճերից յետոյ։ Այս ընթացքում Վաշինգտոնը պատժամիջոցներ է կիրառել մի շարք վրացի պաշտօնեաների, այդ թւում՝ իշխող կուսակցութեան առաջնորդ Բիձինա Իւանիշւիլիի նկատմամբ եւ կասեցրել է Թբիլիսիի հետ ռազմավարական գործընկերութիւնը, քայլ, որը վերլուծաբանները համարում են ԱՄՆ-ի կողմից տարածաշրջանի անկախ կառավարութիւնների նկատմամբ ճնշման քաղաքականութեան մի մասը։
