Դիւանագիտական լարւածութիւն Մոսկւայի եւ Երեւանի միջեւ

Ռուսաստանում Հայաստանի դեսպանին ԱԳՆ կանչելը կրկին վկայում է Ռուսաստանի եւ Հայաստանի միջեւ դիւանագիտական լարւածութեան աճի մասին. լարւածութիւն, որը կարող է ազդել Հարաւային Կովկասում երկու երկրների ռազմավարական յարաբերութիւնների ապագայի վրայ։

ԻՍՆԱ-ի տւեալներով՝ Ռուսաստանի արտաքին գործերի նախարարութիւնը կանչել է Հայաստանի դեսպան Գուրգէն Արսէնեանին՝ դժգոհութիւն յայտնելու Վլադիմիր Զելենսկու ելոյթը Երեւանում հիւրընկալելու եւ Ռուսաստանի դէմ նրա արւած յայտարարութիւնների նկատմամբ բացասական դիրքորոշում չունենալու վերաբերեալ։ Մոսկւան այս գործողութիւնը որակել է որպէս երկու երկրների միջեւ յարաբերութիւնների «գործընկերային» բնոյթին հակասող։

Ռուսաստանի արտաքին գործերի նախարարութեան յայտարարութեան մէջ նաեւ ընդգծւել է, որ Ուկրաինայի նախագահին Հայաստանում հակառուսական դիրքորոշումներ արտայայտելու հարթակ տրամադրելը համարւում է «անընդունելի» գործողութիւն եւ կարող է վնասել փոխադարձ վստահութեանը։

Այս զարգացումները տեղի են ունենում այն դէպքում, երբ վերջին տարիներին Երեւանի եւ Մոսկւայի միջեւ յարաբերութիւնները ուղեկցւել են զգալի վայրիվերումներով, եւ Հայաստանը փորձել է Ռուսաստանի եւ Արեւմուտքի միջեւ աւելի հաւասարակշռւած արտաքին քաղաքականութիւն վարել։

 

Հայաստանում մեկնարկել է ընտրարշաւը՝ ընդդիմութեան առաջնորդի տնային կալանքի եւ լարւած քաղաքական մթնոլորտի պայմաններում

Խորհրդարանական ընտրութիւնների մրցակցութիւնը Հայաստանում սկսւել են այն ժամանակ, երբ ընդդիմադիր հիմնական գործիչներից մէկը՝ «Ուժեղ Հայաստան» կուսակցութեան առաջնորդ Սամուէլ Կարապետեանը, տնային կալանքի պատճառով չի կարողացել մասնակցել ընտրարշաւի առաջին օրւան, ինչը, ըստ նրա հարազատների, «լարւած» նախընտրական գործընթացի մեկնարկի նշան է։

Tasnim-ի փոխանցմամբ, այս կուսակցութեան անդամները յայտարարել են, որ ընտրարշաւը սկսւել է անարդար պայմաններում, եւ որ իրենց առաջնորդը գործնականում հնարաւորութիւն չունի անմիջականօրէն մասնակցելու հանրահաւաքներին եւ քարոզարշաւի միջոցառումներին։

Սամուէլ Կարապետեանը անցեալ տարի՝ Հայ Եկեղեցու մասին մի հարցազրոյցից յետոյ ձերբակալւեց, նախ տեղափոխւեց բանտ, ապա յայտնւեց տնային կալանքում։ Նա այժմ մասնակցում է ընտրարշաւին՝ կիբերտարածքում լրատւամիջոցների եւ կուսակցական ծրագրերի հետ սահմանափակ հաղորդակցութեան միջոցով։

«Ուժեղ Հայաստան» կուսակցութիւնը, որը հիմնադրւել է մէկ տարուց էլ պակաս առաջ, յաւակնում է յունիսի 7-ի ընտրութիւններում յաղթանակի եւ, չնայած իրաւական սահմանափակումներին, Կարապետեանին առաջադրում է որպէս յաջորդ վարչապետի թեկնածու։

Կուսակցութիւնը իր քարոզարշաւը սկսեց խորհրդարանի առջեւ հանրահաւաքով եւ Փաշինեանի վարչակազմի ութամեայ գործունէութեան կոշտ քննադատութեամբ՝ նրան համարելով երկրորդ Ղարաբաղեան պատերազմում կրած պարտութեան եւ երկրի անվտանգութեան մարտահրաւէրների պատասխանատու։ Կուսակցութեան անդամները նաեւ ընդգծել են բազմակողմանի անվտանգութեան շրջանակ ստեղծելու անհրաժեշտութիւնը՝ այնպիսի տէրութիւնների մասնակցութեամբ, ինչպիսիք են Ռուսաստանը, Չինաստանը եւ Միացեալ Նահանգները, թեեւ այս ծրագրի գործնական մեխանիզմը դեռեւս պարզ չէ։

Մասնագէտների կարծիքով, ընդդիմութեան առաջնորդի շարունակական կալանքը եւ լարւած քաղաքական մթնոլորտը առաջիկայ ընտրութիւնները դարձրել են վերջին տարիներին Հայաստանում ամենամրցակցային եւ զգայուն քաղաքական շրջաններից մէկը։