«ԱԼԻՔ» – Ազգային Անվտանգութեան Գերագոյն խորհրդի կառուցւածքային փոփոխութիւնների աւարտին զուգընթաց, կը ձեւաւորւի Պաշտպանութեան խորհուրդ: Այս մասին, երէկ՝ երեկոյեան, տեղեկացրել է «Ֆարս» լրատւական գործակալութիւնը՝ վկայակոչելով հաւաստի աղբիւրները:
Ըստ «Ֆարս»-ի՝ նոր ձեւաւորւող խորհուրդը երկրի պաշտպանական քաղաքականութեան ոլորտում ունենալու է ռազմավարական առաքելութիւններ, եւ որ նրա կառուցւածքը շուտով յստակեցւելու է:
Գործակալութիւնը նաեւ տեղեկացրել է, որ ԱԱԳԽ քարտուղարի պաշտօնում Ալի Աքբար Ահմադիանին կը փոխարինի դոկտ. Ալի Լարիջանին, իսկ Ահմադիանը, հաւանաբար, կը ստանձնի երկրի համար մի քանի յատուկ եւ ռազմավարական նշանակութեան գործերի պատասխանատւութիւնը, որոնք առանցքային կարեւորութիւն ունեն, եւ դրանց ընթացքը ենթադրում է յատուկ համադրումներ՝ երկրի ղեկավարման բարձր մակարդակում:
Թէեւ դեռեւս այս մասին չկայ որեւէ պաշտօնական տեղեկատւութիւն, սակայն, ակնյայտ է, որ 12-օրեայ պատերազմի իրադարձութիւնների ֆոնին, մենք երկրի պաշտպանական, ռազմական եւ անվտանգային դոկտրինայի եւ ղեկավարման կառուցւածքի արմատական փոփոխութիւնների ականատեսն ենք:
Փորձագիտական շրջանականներն արդէն տեւական ժամանակ է, ինչ խօսում են այն մասին, որ պատերազմի ընթացքը ցոյց տւեց, որ ԱԱԳԽ-ը միայնակ անկարող է լուծել երկրի դէմ ծառցած պաշտպանական, ռազմական եւ անվտանգային բնոյթի մարտահրաւէրները, եւ ոլորտի կառուցւածքյին փոփոխութիւններն ու ռազմավարութեան վերանայումն օրակարգային առաջնահերթութիւն է:
Նրանք զգուշացնում են, որ այս փոփոխութիւններն ու վերանայումները չպէտք է սահմանափակւեն անհատների տեղաշարժով եւ չկրեն զուտ արարողակարգային բնոյթ: Ըստ նրանց՝ անհրաժեշտ է ձեւաւորել կից նոր կառոյց (Պաշտպանութեան խորհուրդ-ԽՄԲ.), որը կունենայ պատերազմական պայմաններին համապատասխանող յստակ գործառոյթներ, եւ կը զբաղւի երկրի անվտանգութեան խնդիրներով՝ ձեռնարկելով պայմաններին համապատասխան եւ համաչափ գործնական քայլեր:
