Ի՞նչ տեսակէտ ունի ՀՀ ԱԺ «Հայաստան» խմբակցութիւնը Վաշինգտոնի հռչակագրի մասին
«ԱԼԻՔ» – Օգոստոսի 8-ին Նիկոլ Փաշինեանի, Դոնալդ Թրամփի եւ Իլհամ Ալիեւի՝ Սպիտակ տանը կայացած եռակողմ հանդիպմանը ստորագրւել է համատեղ Հռչակագիրը Վաշինգտոնում տեղի ունեցած հանդիպման արդիւնքների մասին։
Ի՞նչ տեսակէտ ունի ՀՀ ԱԺ «Հայաստան» խմբակցութիւնը նշւած Հռչակագրում տեղ գտած դրոյթների եւ ի յայտ եկած նոր գործընթացների վերաբերեալ։ Yerkir.am-ի հարցադրմանը պատասխանել է խմբակցութեան ղեկավար Սէյրան Օհանեանը.
«Ստորագրւած փաստաթղթերն ու դրանց մեծ կարեւորութիւն տւող իշխանական քարոզչութիւնը որեւէ առնչութիւն չունեն իրական խաղաղութեան հետ: Նախաստորագւած պայմանագրի հրապարակումից յետոյ մենք առաւել մանրամասն կանդրադառնանք այս խնդիրներին։ Իսկ մինչ այդ` կրկին փաստենք, որ Նիկոլ Փաշինեանը խախտում է ՀՀ Սահմանադրութիւնն ու կառավարութեան ստանձնած հանրային-իրաւական պարտաւորութիւնները։
Մեր ժողովրդին պարտադրւող պարտութիւնների այս արատաւոր շղթայից հնարաւոր է դուրս գալ, վերականգնել մեր ազգային արժանապատւութիւնը, կերտել ամուր պետականութիւն եւ բերել իրական խաղաղութիւն: Այն իրականացնելու համար պէտք է բացառել Հայաստանի գործող ռեժիմի վերարտադրութիւնը: Ազգային ողբերգութեան հեղինակը խաղաղութիւն չի կարող ապահովել»,- յայտնել է Սէյրան Օհանեանը:
