ԱԳՆ խօսնակ. «Իրանը դէմ է Հարաւային Կովկասում արտատարածաշրջանային ուժերի միջամտութեանը»
«ԱԼԻՔ» – Իրանը դէմ է Հարաւային Կովկասում արտատարածաշրջանային ուժերի միջամտութեանը: Այս մասին, երէկ՝ օգոստոսի 11-ին, լրագրողների հետ շաբաթական ճեպազրոյցի ընթացքում յայտարարել է ԱԳ նախարարութեան պաշտօնական ներկայացուցիչ Էսմայիլ Բաղային:
Նա ընդգծել է, որ Իրանը, հաշւի առնելով Հարաւային Կովկասի աշխարհաքաղաքական, քաղաքական եւ տնտեսական կարեւորութիւնը, միշտ ակտիւ դեր է ունեցել այս տարածաշրջանի զարգացումներում, սերտ կապի մէջ է եղել ինչպէս Ադրբեջանի, այնպէս էլ Հայաստանի հետ։
«Իրան-Հայաստան յարաբերութիւնները, կարճ, բայց ապահով ընդհանուր սահման ունենալու պատճառով, հիմնւած են հինաւուրց բարեկամութեան եւ համագործակցութեան վրայ»,- ընդգծել է նա:
Բաղայիի խօսքով՝ Իրանը, ողջունելով տարածաշրջանային հաղորդակցման ուղիների ընդլայնումը տնտեսական զարգացման նպատակով, բայց, միեւնոյն ժամանակ, շեշտում է, որ այս գործողութիւնները չպէտք է խախտեն միջազգային իրաւունքը, միջազգային սահմանները, ազգային ինքնիշխանութիւնը կամ աշխարհաքաղաքական կառուցւածքները։
«Արտատարածաշրջանային ուժերի միջամտութիւնն այս ոլորտում, Իրանի տեսանկիւնից, վնասակար է տարածաշրջանի անվտանգութեան եւ կայունութեան համար, եւ Իրանն իր ընդդիմութիւնն արդէն բացայայտ արտայայտել է»,- ընդգծել է ԱԳՆ մամլոյ խօսնակը:
