Թրամփը Զելենսկուն յայտնել է, որ արդէն օգոստոսի 22-ին ցանկանում է եռակողմ գագաթնաժողով անցկացնել

«ԱԼԻՔ» – ԱՄՆ նախագահ Դոնալդ Թրամփը Ուկրաինայի նախագահ Վլադիմիր Զելենսկու եւ խօսակցութեան միւս մասնակիցների հետ հեռախօսազրոյցի ընթացքում յայտարարել է, որ ցանկանում է արդէն օգոստոսի 22-ին ԱՄՆ-ի, Ռուսաստանի եւ Ուկրաինայի ղեկավարների մասնակցութեամբ եռակողմ գագաթնաժողով անցկացնել: Այս մասին ըստ News.am-ի՝ գրում է Axios-ը՝ յղում անելով իր աղբիւրներին։

Ինչպէս ընդգծում է լրատւամիջոցը, խաղաղութեան պայմանները, որոնք Ռուսաստանի նախագահ Վլադիմիր Պուտինը շարադրել է նախագահ Թրամփի հետ գագաթնաժողովում, ներառում էին Ուկրաինայի ամբողջական դուրսբերումը իր երկու արեւելեան մարզերից։

Թրամփը երկուշաբթի Վաշինգտոնում կը հանդիպի Ուկրաինայի նախագահ Վլադիմիր Զելենսկու հետ։ Ըստ աղբիւրների, նա նաեւ գագաթնաժողովից յետոյ հեռախօսազրոյցի ընթացքում եւրոպացի առաջնորդներին յայտնել է, որ ցանկանում է եռակողմ գագաթնաժողով կազմակերպել Պուտինի եւ Զելենսկու հետ արդէն յաջորդ ուրբաթ օրը։ Սակայն, ելնելով Պուտինի պայմաններից, լուրջ առաջընթացը քիչ հաւանական է թւում։

Թրամփը նաեւ եւրոպացի առաջնորդներին հրաւիրել է միանալու Սպիտակ տանը երկուշաբթի օրը կայանալիք հանդիպմանը, յայտնել են աղբիւրները։ Թրամփը եւ նրա յատուկ բանագնաց Սթիւ Ուիթքոֆը երէկ երեկոյեան Վաշինգտոն վերադառնալու ճանապարհին Զելենսկուն եւ Մեծ Բրիտանիայի, Ֆրանսիայի, Գերմանիայի, Իտալիայի, Ֆինլանդիայի, ՆԱՏՕ-ի եւ Եւրայանձնաժողովի ղեկավարներին տեղեկացրել են Պուտինի դիրքորոշման մասին։

Ըստ նրանց, Պուտինը պահանջել է, որ Ուկրաինան զիջի չորս մարզերից երկուսը, որոնց յաւակնում է Ռուսաստանը (Դոնեցկի եւ Լուգանսկի), եւ սառեցնի ճակատային գծերը միւս երկուսում (Խերսոնի եւ Զապորոժիէի)։ Ռուսաստանը վերահսկում է գրեթէ ամբողջ Լուգանսկը, բայց Դոնեցկի միայն մօտ երեք քառորդը։

Ըստ հեռախօսազրոյցի մասին տեղեկացւած աղբիւրներից մէկի, Պուտինը յայտարարել է Խերսոնում եւ Զապորոժիէում յարձակումը դադարեցնելու իր պատրաստակամութեան մասին՝ որպէս զիջում՝ Դոնեցկից Ուկրաինայի դուրս գալու դիմաց։ Իրականում Ռուսաստանն արդէն որոշ ժամանակ է, ինչ որեւէ առաջընթաց չի գրանցում այս մարզերում։

Ուկրաինական աղբիւրը յայտնել է, որ ամերիկեան կողմի մօտ տպաւորութիւն է ստեղծւել, թէ Պուտինը պատրաստ է բանակցութիւններ վարել Ռուսաստանի վերահսկողութեան տակ գտնւող Սումիի եւ Խարկովի մարզերի փոքր տարածքների շուրջ։

Այս առաջարկը նախատեսում է զգալիօրէն աւելի մեծ տարածքի փոխանցում Ուկրաինայի վերահսկողութիւնից Ռուսաստանի վերահսկողութեանը, քան հակառակը, ինչը, Մոսկւայի կարծիքով, խելամիտ է, քանի որ Ռուսաստանը ռազմական առումով առաւելութիւն ունի, բայց ինչը Ուկրաինան գրեթէ անկասկած կը մերժի։

Ըստ աղբիւրի, Պուտինը նաեւ պահանջել է, որ ԱՄՆ-ն ճանաչի Ռուսաստանի ինքնիշխանութիւնն Ուկրաինայի այն մասերում, որոնք կը ստանայ խաղաղութեան համաձայնագրի համաձայն։ Թրամփը հանդիպումը յաջողւած է անւանել եւ ասել, որ ինքն ու Պուտինը համաձայնութեան են եկել շատ հարցերի շուրջ, թէեւ Պուտինը, կարծես, հաւատարիմ է մնում իր մաքսիմալիստական պահանջներից շատերին։

Ընդ որում, պարբերականն ընդգծում է, որ Պուտինն իսկապէս ասել է, որ պատրաստ է քնարկել Ուկրաինայի անվտանգութեան երաշխիքները, յայտնել է աղբիւրը։ Սակայն նա Չինաստանը նշել է որպէս հնարաւոր երաշխաւորներից մէկը՝ հաւանաբար ենթադրելով, որ դէմ է հանդէս գալու ՆԱՏՕ-ի զինծառայողներից բաղկացած անվտանգութեան ուժերին։