Լարիջանի. «Իրանի համար Հայաստանի հետ յարաբերութիւնները ռազմավարական նշանակութեան են»
«ԱԼԻՔ» – Ազգային Անվտանգութեան Գերագոյն խորհրդի քարտուղար Ալի Լարիջանին հեռախօսազրոյց է ունեցել ՀՀ Անվտանգութեան խորհրդի քարտուղար Արմէն Գրիգորեանի հետ։
ՀՀ ԱԽ գրասենեակից յայտնում են, որ Արմէն Գրիգորեանը շնորհաւորել է Ալի Լարիջանիին Ազգային Անվտանգութեան Գերագոյն խորհրդի քարտուղար նշանակւելու կապակցութեամբ եւ մաղթել յաջողութիւններ այդ պատասխանատու ու կարեւոր պաշտօնում:
Նա ընդգծել է, որ Հայաստանի եւ Իրանի միջեւ հաստատւած են ինստիտուցիոնալ կապեր եւ վստահութիւն յայտնել, որ գործող պայմանաւորւածութիւնների իրագործումը կը շարունակւի, իսկ համագործակցութեան նոր ուղղութիւնները մօտ ապագայում կը նախանշւեն:
Ալի Լարիջանին շնորհակալութիւն է յայտնել բարեմաղթանքի համար եւ ընդգծել, որ Իրանի համար Հայաստանի հետ յարաբերութիւնները ռազմավարական նշանակութեան են: Նա յաւելել է նաեւ, որ Իրան-Հայաստան երկկողմ համագործակցութիւնը միշտ դրական արդիւնք է ունեցել, եւ որ պատրաստ է իր ներդրումն ունենալ բազմաոլորտ համագործակցութեան շրջանակներում:
Հեռախօսազանգի վերջում Ազգային Անվտանգութեան Գերագոյն խորհրդի քարտուղարը ՀՀ ԱԽ քարտուղարին հրաւիրել է Իրան:
