Հրանտ Միքայէլեան. «Ուկրաինական հակամարտութիւնից յետոյ ՌԴ գլխաւոր թիրախային ուղղութիւնը լինելու է Հարաւային Կովկասը»

«ԱԼԻՔ» – Ալեասկայում շուրջ երեք ժամ շարունակւած բանակցութիւններից յետոյ Թրամփն ու Պուտինը յայտարարեցին՝ ինչ-ինչ հարցերի շուրջ եկել են համաձայնութեան։ Պուտինը հանդիպումը բնորոշեց կառուցողական. ըստ նրա՝ «ձեռք բերւած պայմանաւորւածութիւնները կարող են մեկնարկային կէտ լինել Ուկրաինայի հակամարտութեան կարգաւորման եւ Ռուսաստանի ու ԱՄՆ-ի միջեւ կապերի վերականգնման համար»։

Թրամփը նշեց, որ համաձայնեցւած կէտերից զատ՝ «կան մի քանի կարեւոր կէտեր, որոնց դեռ լիովին չեն հասել, բայց որոշակի առաջընթաց են գրանցել»։

Այս օրերին յաճախ տեսակէտներ են հնչում, որ Պուտին-Թրամփ բանակցութիւնները միջազգային յարաբերութիւնների ճարտարապետութեան հնարաւոր փոփոխութեան նոր սկիզբ են դառնալու, իսկ քաղաքագէտ Հրանտ Միքայէլեանը նաեւ վստահեցնում է՝ Ռուսաստանի համար Կովկասն արդէն առաջնահերթութիւն է դառնալու։

«Ուկրաինական հակամարտութիւնից յետոյ ՌԴ գլխաւոր թիրախային ուղղութիւնը լինելու է Հարաւային Կովկասը,- 168․am-ի հետ զրոյցում նշել է քաղաքագէտը, ապա անդրադառնալով դիտարկմանը, թէ կան տեսակէտներ, թէ գուցէ պայմանաւորւածութիւններ կան, որ Թրամփն աչք փակի ուկրաինական ուղղութեան վրայ, իսկ Պուտինը՝ Հարաւային Կովկասի, յաւելեց,- եթէ ինչ-որ մէկն էլ այստեղ զիջելու է, ապա՝ Թրամփը»։

Ամէն դէպքում, Հրանտ Միքայէլեանի համոզմամբ՝ մի բան պարզ է, որ մրցակցութիւնը տարածաշրջանի համար աւելի է մեծանալու։

«Թրամփը, կարելի է ասել, խաբել է Պուտինին՝ ասելով, թէ Հարաւային Կովկասում հետաքրքրութիւն չունի, բայց գաղտնի բանակցութիւն է վարել, որի վերջնարդիւնքը տեսանք Վաշինգտոնում։ Եւ այժմ Պուտինի հերթն է լինելու՝ յետ բերելու ազդեցութիւնն այս տարածաշրջանում եւ մօտակայ ամիսներին՝ յատկապէս ուկրաինական պատերազմի աւարտից յետոյ, պայքար է լինելու նաեւ այստեղ։

Մենք գնում ենք պատերազմի աւարտ, եւ հիմնական պայմանաւորւածոթիւններն էլ, ամենայն հաւանականութեամբ, դրա մասին էին»,- պարզաբանել է նա։

Քաղաքագէտի համոզմամբ՝ պատերազմը սնուցող այլ խաղացողներ կան՝ Մեծ Բրիտանիա, Գերմանիա, եւրոպական այլ երկրներ, սակայն, ըստ նրա, աւելի է մօտենում պահը, երբ ԱՄՆ-ը կորոշի ուղղակի փակել պատերազմի թեման։

«Զելենսկին իրականութիւնից կտրւած 5 կէտանոց պլան է առաջ բերել, եւ, հաւանաբար, մօտենում ենք պահին, որ ԱՄՆ-ը ասելու է՝ Ուկրաինային այլեւս չի աջակցելու։ Վերջինի պարագայում ՌԴ յաղթանակն աւելի կը մօտենայ։ Սա մի քանի ամսւայ հեռանկար է՝ հաւանաբար կէս տարւայ,- նկատել է Հրանտ Միքայէլեանը՝ յաւելելով. «Թէեւ դեռ պարզ չէ, թէ ուկրաինական պատերազմի աւարտից յետոյ դասաւորւածութիւնն ինչպիսին կը լինի, այդուհանդերձ հասկանալի է, որ Հարաւային Կովկասում ամէն մէկը փորձելու է իր բոլոր քարտերը նետել խաղի մէջ։ Ռուսաստանը փորձելու է ստիպել Հայաստանին եւ Ադրբեջանին՝ հաշւի նստել ՌԴ դիրքորոշման հետ, իսկ յետոյ՝ արդէն նաեւ ընտրական պրոցեսներում է լինելու պայքարը»։

Զրույցը՝ ԶԱՐՈՒՀԻ ԴԻԼԱՆԵԱՆԻ